പയ്യന്നൂരില്‍ ബി.ജെ.പി-സി.പി.എംസംഘര്‍ഷം; രണ്ടു പേര്‍ക്ക് വെട്ടേററു

പയ്യന്നൂര്‍ : മാടായിയിലും പയ്യന്നൂരിലുമുണ്ടായ വ്യത്യസ്ത സംഭവങ്ങളില്‍ ഡി.വൈ.എഫ്.ഐ., ബി.എം.എസ്. പ്രവര്‍ത്തകര്‍ക്ക് വെട്ടേറ്റു. ഡി.വൈ.എഫ്.ഐ. പ്രവര്‍ത്തകനും ഓട്ടോഡ്രൈവറുമായ ടി.വി.രതീശന് (33) മാടായിയിലും ബി.എം.എസ്. പ്രവര്‍ത്തകനും ചുമട്ടുതൊഴിലാളിയുമായ കാങ്കോല്‍ വടശ്ശേരിയിലെ അടുക്കാടന്‍ വീട്ടില്‍ നിജീഷിന് (26) പയ്യന്നൂര്‍ ടൗണിലും വെച്ചാണ് വെട്ടേറ്റത്. രതീശന്റെ നില ഗുരുതരമാണ്.

ശനിയാഴ്ച ഉച്ചയ്ക്ക് ഒരുമണിയോടെ മാടായിപ്പാറ വെങ്ങര കീയച്ചാല്‍ റോഡിലാണ് രതീശനുനേരെ ആക്രമണമുണ്ടായത്. പയ്യന്നൂരില്‍നിന്ന് രണ്ടുപേര്‍ ട്രിപ്പ് വിളിച്ചുകൊണ്ടുപോയാണ് രതീശനെ ആക്രമിച്ചത്. രണ്ട് ബൈക്ക് യാത്രികരും അക്രമത്തില്‍ പങ്കുചേര്‍ന്നു. രതീശന്‍ പരിയാരം മെഡിക്കല്‍ കോളേജ് ആസ്​പത്രിയില്‍ ചികിത്സയിലാണ്. വൈകിട്ട് നാലുമണിയോടെ പയ്യന്നൂര്‍ ബി.എസ്.എന്‍.എല്‍. ഓഫീസിനുസമീപംവെച്ച് വെട്ടേറ്റ നിജീഷിനെ ചികിത്സയ്ക്കായി മംഗലാപുരത്തേക്ക് കൊണ്ടുപോയി.

പയ്യന്നൂര്‍ പെരുമ്പയില്‍ ആര്‍.എസ്.എസ്. പ്രവര്‍ത്തകന്‍ കൊല്ലപ്പെട്ടതിന്റെ തുടര്‍ച്ചയാണ് ഡി.വൈ.എഫ്.ഐ. പ്രവര്‍ത്തകനുനേരെയുണ്ടായ ആക്രമണമെന്നാണ് പോലീസ് നിഗമനം. എടാട്ട് പറമ്പത്തെ ഡി.വൈ.എഫ്.ഐ. യൂണിറ്റ് സെക്രട്ടറിയും പയ്യന്നൂര്‍ ടൗണിലെ ഓട്ടോഡ്രൈവറും സി.ഐ.ടി.യു. പ്രവര്‍ത്തകനുമാണ് ആക്രമിക്കപ്പെട്ട രതീശന്‍.

കൈയില്‍ പെട്ടിയുമായി എത്തിയ രണ്ടുപേരാണ് പയ്യന്നൂര്‍ ടൗണില്‍നിന്ന് രതീശനെ ട്രിപ്പ്‌വിളിച്ച് മാടായിയിലേക്ക് കൊണ്ടുപോയത്. മാടായിപ്പാറയ്ക്ക് സമീപം വെങ്ങര കീയച്ചാല്‍ റോഡില്‍ എത്തിയപ്പോള്‍ പിന്നാലെയുണ്ടായിരുന്ന ഒരു ബൈക്ക് ഓട്ടോയെ മറികടന്ന് മുന്നില്‍ വന്നുനിന്നു. ബൈക്കിലെത്തിയവരും ഓട്ടോയില്‍ വന്നവരും ചേര്‍ന്നാണ് രതീശനെ ആക്രമിച്ചത്.

ഓട്ടോറിക്ഷയില്‍നിന്ന് ഇറങ്ങിയോടിയ രതീശനെ പിന്തുടര്‍ന്ന് അക്രമികള്‍ വെട്ടിവീഴ്ത്തി. രതീശന്റെ കരച്ചില്‍കേട്ട് സമീപവാസികള്‍ എത്തിയപ്പോള്‍ അക്രമികള്‍ രക്ഷപ്പെട്ടു. പഴയങ്ങാടി എസ്.ഐ. ഇ.കെ.ഷിജുവും സംഘവും വന്നാണ് രതീശനെ പരിയാരം മെഡിക്കല്‍ കോളേജ് ആസ്​പത്രിയില്‍ എത്തിച്ചത്. തലയ്ക്കും ഇരു കൈകാലുകള്‍ക്കും വെട്ടേറ്റ രതീശന്റെ ഒരു കണ്ണ് പുറത്തായ നിലയിലാണ്.

ഈ സംഭവത്തിന്റെ തുടര്‍ച്ചയായാണ് പയ്യന്നൂര്‍ ടൗണില്‍ നിജീഷ് ആക്രമിക്കപ്പെട്ടത്. സഹപ്രവര്‍ത്തകര്‍ക്കൊപ്പം പയ്യന്നൂര്‍ പോലീസ് സ്റ്റേഷന് തൊട്ടടുത്തുള്ള ബി.എസ്.എന്‍.എല്‍. ഓഫീസിനുസമീപം ജോലി ചെയ്യവേയാണ് അക്രമം. വാഹനത്തിലെത്തിയ അക്രമികള്‍ മിന്നലാക്രമണമാണ് നടത്തിയത്. നിജീഷിന്റെ തലയ്ക്കും കാലുകള്‍ക്കും പരിക്കുണ്ട്. വെട്ടേറ്റുകിടന്ന നിജീഷിനെ ആരും ആസ്​പത്രിയില്‍ കൊണ്ടുപോകാന്‍ തയ്യാറായില്ല. പോലീസ് എത്തിയാണ് പയ്യന്നൂരിലെ സ്വകാര്യ ആസ്​പത്രിയിലേക്ക് മാറ്റിയത്. പിന്നീട് മംഗലാപുരത്തേക്ക് കൊണ്ടുപോയി.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News