മക്കള്‍ പ്രണയത്തിലായാലും വിവാഹക്കാര്യത്തില്‍ മാതാപിതാക്കള്‍ക്ക് ഇടപെടാമെന്ന് ഹൈക്കോടതി

കൊച്ചി: പ്രായപൂര്‍ത്തിയായ മക്കള്‍ പ്രണയത്തിലായാലും അവരുടെ കാര്യത്തില്‍ ഇടപെടാന്‍ മാതാപിതാക്കള്‍ക്ക് അവകാശമുണ്ടെന്ന് ഹൈക്കോടതി. താന്‍ വിവാഹം കഴിക്കാനാഗ്രഹിക്കുന്ന യുവതിയെ വീട്ടുകാര്‍ തടഞ്ഞുവെച്ചിരിക്കയാണെന്ന് കാണിച്ച് യുവാവ് നല്‍കിയ ഹര്‍ജിയില്‍ ഇടപെടാന്‍ വിസമ്മതിച്ചുകൊണ്ടാണ് ഹൈക്കോടതിയുടെ ഈ വിലയിരുത്തല്‍.

മക്കള്‍ നല്ല രീതിയില്‍ ജീവിക്കണമെന്നാണ് മാതാപിതാക്കളുടെ ആഗ്രഹം അതുകൊണ്ടുതന്നെ അവര്‍ തെറ്റായ തീരുമാനം എടുക്കുകയാണെന്ന് കണ്ടാല്‍ മാതാപിതാക്കള്‍ക്ക് ഇടപെടാമെന്ന് ജസ്റ്റിസ് ആന്റണി ഡൊമിനിക്കും ജസ്റ്റിസ് അനില്‍ കെ. നരേന്ദ്രനും ഉള്‍പ്പെട്ട ഡിവിഷന്‍ ബെഞ്ച് വിലയിരുത്തി.

ഏറെക്കാലമായി തങ്ങള്‍ പ്രണയത്തിലാണെന്നും എന്നാല്‍ ഇക്കാര്യം വീട്ടില്‍ അറിഞ്ഞതുമുതല്‍ പെണ്‍കുട്ടിയെ വീട്ടുകാര്‍ തുടര്‍ പഠനത്തിനുപോലും അനുവദിക്കാതെ തടഞ്ഞുവച്ചിരിക്കുകയാണെന്ന് അങ്കമാലി സ്വദേശിയായ ഡോക്ടര്‍ കോടതിയെ ബോധിപ്പിച്ചു.

എന്നാല്‍ യുവാവിന്റെ സ്വഭാവത്തെയും പശ്ചാത്തലത്തെയും കുറിച്ച് അന്വേഷിച്ചതിനാലാണ് യുവതിയുടെ ഭാവിയെക്കുറിച്ച് ആശങ്കപ്പെടുന്നതെന്ന് അവരുടെ പിതാവ് ബോധിപ്പിക്കുന്നു. ഹര്‍ജിക്കാരനുമായി പ്രേമത്തിലാണെന്നും മാതാപിതാക്കള്‍ നിയന്ത്രണം ഏര്‍പ്പെടുത്തിയിരിക്കുകയാണെന്നും യുവതി കോടതിയെ അറിയിച്ചു. തുടര്‍ന്ന് കോടതിയുടെ നിര്‍ദേശപ്രകാരം യുവതിയെ ഹോസ്റ്റലില്‍ പാര്‍പ്പിച്ചിരുന്നു.

കുടുംബ ബന്ധങ്ങളെ തകര്‍ക്കാന്‍ സ്വാതന്ത്ര്യം ദുരുപയോഗം ചെയ്യരുത്. മക്കളെ ഉപദേശിക്കാനും ശരിയായ വഴി കാട്ടിക്കൊടുക്കാനും മാതാപിതാക്കള്‍ക്ക് അധികാരം നല്‍കുന്നതാണ് നമ്മുടെ സാമൂഹികമൂല്യവ്യവസ്ഥ. മകളോ മകനോ പക്വതയില്ലാത്ത തീരുമാനമെടുക്കുമ്പോള്‍ മാതാപിതാക്കള്‍ നിസ്സഹായരായിരിക്കണമെന്ന് കരുതാനാവില്ല. അത്തരം തീരുമാനങ്ങള്‍ കുട്ടികളുടെ ജീവിതത്തിനു മാത്രമല്ല കുടുംബത്തിനാകെ വിനാശകരമായേക്കാം. മാര്‍ഗനിര്‍ദേശം നല്‍കാനുള്ള മാതാപിതാക്കളുടെ അധികാരം ആത്യന്തികമായി മക്കളുടെ നന്മയ്ക്കാവുമെന്ന് കോടതി വിലയിരുത്തി.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News, High Court Order.