ജുമുഅ നമസ്‌കാരസമയത്ത് പരീക്ഷ: ഹൈക്കോടതിയില്‍ ഹരജി

കൊച്ചി: വെള്ളിയാഴ്ചകളില്‍ ജുമുഅ നമസ്‌കാര സമയത്ത് സി.ബി.എസ്.ഇ പരീക്ഷകള്‍ നടത്തുന്നതിനെതിരേ ഹൈക്കോടതിയില്‍ ഹരജി. 10, പ്ലസ്ടു വിദ്യാര്‍ഥികള്‍ക്ക് രാവിലെ 10 മുതല്‍ 1.30 വരെയാണു പരീക്ഷാ സമയം. അതിനാല്‍ ജുമുഅ നമസ്‌കാരത്തില്‍ പങ്കെടുക്കാന്‍ കഴിയുന്നില്ലെന്നു കാണിച്ച് വിദ്യാര്‍ഥികളായ മുഹമ്മദ് മുഹ്‌സിന്‍, ഹബീല്‍ സിദ്ദീഖ്, എസ്.ഐ.ഒ സംസ്ഥാന സെക്രട്ടറി അനസ് എന്നിവരാണ് അഡ്വ. തൗഫീഖ് അഹ്മദ് മുഖേന ഹരജി നല്‍കിയത്.
സര്‍വകലാശാലകളടക്കം ജുമുഅ നമസ്‌കാരസമയം ക്രമീകരിച്ചാണു പരീക്ഷ നടത്തുന്നത്. എന്നാല്‍ നിവേദനങ്ങള്‍ നല്‍കിയിട്ടും സി.ബി.എസ്.ഇ പരീക്ഷാസമയത്തില്‍ മാറ്റംവരുത്തിയിട്ടില്ലെന്നു കാണിച്ചാണു ഹരജി. ഹരജി വ്യാഴാഴ്ച കോടതി പരിഗണിക്കും.