കാസര്‍കോടിന് പ്രധാന പദ്ധതികളില്ല; പ്രഭാകരന്‍ കമ്മീഷനെ പരിഗണിച്ചില്ല

കാസര്‍കോട്: വെളളിയാഴ്ച ധനമന്ത്രി അവതരിപ്പിച്ച സംസ്ഥാന ബജറ്റില്‍ കാസര്‍കോട് ജില്ലയ്ക്കു പ്രധാനപദ്ധതികളൊന്നുമില്ല. എന്‍ഡോസള്‍ഫാന്‍ മേഖലയില്‍ 15 കോടി രൂപ അനുവദിച്ചത് മാത്രമാണു എടുത്തുപറയാനുള്ളത്. അവികസിതമായ ജില്ലയുടെ സമഗ്രവികസനത്തിന് സര്‍ക്കാര്‍ രുപീകരിച്ച പ്രഭാകരന്‍ കമ്മീഷന്‍ റിപോര്‍ട്ടിലെ ശുപാര്‍ശകള്‍ നടപ്പിലാക്കാന്‍ ബജറ്റില്‍ ഫണ്ട് വകയിരുത്തിയിട്ടില്ല. ഈമാസം 27നു തിരുവനന്തപുരത്ത് പ്രഭാകരന്‍ കമ്മീഷന്‍ റിപോര്‍ട്ട് നടപ്പിലാക്കുന്നതുമായി ബന്ധപ്പെട്ട് ഉന്നതതല ചര്‍ച്ച നടത്താന്‍ തീരുമാനിച്ചിരുന്നു. എന്നാല്‍ കമ്മീഷന്‍ റിപോര്‍ട്ട് തന്നെ നടപ്പിലാവുമോ എന്ന ആശങ്കയിലാണ് ജില്ലയിലെ ജനങ്ങള്‍.
എന്‍ഡോസള്‍ഫാന്‍ ദുരിതബാധിതരുടെ തുടര്‍ ചികില്‍സയ്ക്കും പുനരധിവാസത്തിനും ബജറ്റില്‍ പദ്ധതിയൊന്നുമില്ല. ഉദുമയിലെ മൈലാട്ടി സ്പിന്നിങ് മില്‍ കിന്‍ഫ്രയുടെ നേതൃത്വത്തില്‍ പാര്‍ക്കാക്കി മാറ്റുമെന്ന പ്രഖ്യാപനമാണുള്ളത്. മഞ്ചേശ്വരം, കാസര്‍കോട് മണ്ഡലങ്ങളില്‍ രണ്ട് റോഡുകളുടെ പുനരുദ്ധാരണത്തിന് ഫണ്ട് അനുവദിച്ചിട്ടുണ്ട്. മഞ്ചേശ്വരം തുറമുഖത്തിനും ബജറ്റില്‍ ആനുപാതിക വിഹിതം ലഭിക്കും. ഇതിന് കേന്ദ്രസര്‍ക്കാര്‍ നേരത്തേ 49.8 കോടി രൂപ അനുവദിച്ചിരുന്നു. കാര്‍ഷിക മേഖലയ്ക്കും കാര്യമായ നേട്ടമൊന്നുമില്ല.
ജില്ലയിലെ അടയ്ക്ക കര്‍ഷകര്‍ക്കു സര്‍ക്കാര്‍ പ്രഖ്യാപിച്ച പാക്കേജിനെക്കുറിച്ചും ബജറ്റില്‍ പ്രതിപാദിച്ചിട്ടില്ല. വിലക്കുറവും രോഗവും മൂലം ജില്ലയിലെ അടയ്ക്ക കര്‍ഷകര്‍ ഏറെ ദുരിതം അനുഭവിക്കുന്നുണ്ട്. ഇവര്‍ക്കു കഴിഞ്ഞ സര്‍ക്കാരിന്റെ കാലത്ത് പ്രഖ്യാപിച്ച പാക്കേജ് ഇപ്പോഴും ഫയലിലൊതുങ്ങുകയാണ്. ഏറ്റവും കൂടുതല്‍ കശുവണ്ടി ഉല്‍പ്പാദിപ്പിക്കുന്ന ജില്ലയിലെ കശുവണ്ടി കര്‍ഷകര്‍ക്കും പാക്കേജില്‍ ഇടം നേടാനായില്ല. ആരോഗ്യ, വിദ്യാഭ്യാസ, മേഖലകളിലും കാര്യമായ ഇടപെടല്‍ ഉണ്ടായി­ട്ടില്ല. 

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Mapappuram News