കാസര്‍കോട് മെഡിക്കല്‍ കോളജിന്റെ പ്രവൃത്തി ഉടന്‍ ആരംഭിക്കണം: എസ്.ടി.യു

കാസര്‍കോട്: കാസര്‍കോട് ജില്ലക്ക് അനുവദിച്ച് തറക്കല്ലിട്ടുകഴിഞ്ഞ ബദിയടുക്കയിലെ മെഡിക്കല്‍ കോളജിന്റെ നിര്‍മ്മാണ പ്രവൃത്തി ഉടന്‍ ആരംഭിക്കണമെന്ന് എസ്.ടി.യു. കാസര്‍കോട്ജില്ലാ പ്രവര്‍ത്തക സമിതി അംഗങ്ങളുടെയും ഫെഡറേഷന്‍ ഭാരവാഹികളുടെയും യോഗം ആവശ്യപ്പെട്ടു. 

ഇതോടൊപ്പം അനുവദിച്ച മറ്റു ജില്ലകളിലെ മെഡിക്കല്‍കോളജുകളുടെ നിര്‍മ്മാണ പ്രവര്‍ത്തനം യുദ്ധകാലാടിസ്ഥാനത്തില്‍ പുരോഗമിച്ചുകൊണ്ടിരിക്കുമ്പോള്‍ കാസര്‍കോട് ജില്ലയിലെ മെഡിക്കല്‍ കോളജിന്റെ നിര്‍മ്മാണ പ്രവൃത്തി ആരംഭിക്കാത്തതില്‍ യോഗം ഉല്‍കണ്ഠരേഖപ്പെടുത്തി. 

ഈ ആവശ്യം ഉന്നയിച്ച് മുസ്‌ലിം ലീഗ് ജില്ലാ കമ്മിറ്റിയുടെ ആഭിമുഖ്യത്തില്‍ നവംബര്‍ മൂന്നിന് കലക്ടറേറ്റ് പടിക്കല്‍ നടക്കുന്ന ധര്‍ണാ സമരം വിജയിപ്പിക്കാന്‍ തീരുമാനിച്ചു.

തൊഴില്‍ നിയമങ്ങളില്‍ ഭേദഗതി വരുത്തി ദേശീയതലത്തില്‍ കേന്ദ്ര ഗവണ്‍മെന്റ് തൊഴിലാളി വിരുദ്ധ നിയമങ്ങള്‍ കൊണ്ടുവരാനുള്ള നീക്കത്തിനെതിരെ കേന്ദ്ര ട്രേഡ് യൂണിയന്‍ സംഘടനകള്‍ നടത്തുന്ന രാജ്യവ്യാപകമായ പ്രക്ഷോഭ പരിപാടിയില്‍ ജില്ലയില്‍ എസ്.ടി.യു.വിന്റെ പങ്കാളിത്തം ഉറപ്പ് വരുത്താന്‍ യോഗം തീരുമാനിച്ചു. 

ജില്ലാ പ്രസിഡണ്ട് കെ.പി. മുഹമ്മദ് അഷ്‌റഫ് അധ്യക്ഷത വഹിച്ചു. സംസ്ഥാന വൈസ് പ്രസിഡണ്ട് എ.അബ്ദുല്‍ റഹ്മാന്‍ ഉദ്ഘാടനംചെയ്തു. ജനറല്‍ സെക്രട്ടറി ശംസുദ്ദീന്‍ ആയിറ്റി സ്വാഗതം പറഞ്ഞു. എ.അഹമ്മദ് ഹാജി, ബി.കെ.അബ്ദുസമദ്, ശരീഫ് കൊടവഞ്ചി, അബ്ദുല്‍ റഹ്മാന്‍ ബന്തിയോട്, കുഞ്ഞാമദ് കല്ലൂരാവി, കെ.എം.സി. ഇബ്രാഹിം, കെ.എ. മുസ്തഫ, പി.ഐ.എ. ലത്തീഫ്, എം.എ. മക്കാര്‍, മുജീബ് കമ്പാര്‍, എം.കെ. അലി, അഷ്‌റഫ് എടനീര്‍, യൂനുസ് വടകരമുക്ക്, മുത്തലിബ് പാറക്കെട്ട്, ഉമ്മര്‍ അപ്പോളോ, ഹമീദ് പള്ളത്തടുക്ക, ബി.പി. മുഹമ്മദ്, മുംതാസ് സമീറ, കരീം കുശാല്‍ നഗര്‍, ജാഫര്‍ മൂവാരിക്കുണ്ട് സംസാരിച്ചു.

Keywords: Kasaragod, Stu, Kasaragod Medical Collage, Kerala News, National News, Gulf News, Health News, Educational News, MalabarFlash, Malabar Vartha, Malabar News, Malayalam News