Latest News

സ്‌ഫോടനത്തില്‍ എന്‍.എ. ഹാരിസ് എം.എല്‍.എ അടക്കം അഞ്ചുപേര്‍ക്ക് പരിക്ക്

ബംഗളൂരു: ശാന്തിനഗർ ഹൊണ്ണാർപേട്ടിലുണ്ടായ നേരിയ സ്​ഫോടനത്തിൽ കോൺഗ്രസ്​ എം.എൽ.എയും മലയാളിയുമായ എൻ.എ. ഹാരിസ്​ അടക്കം അഞ്ചുപേർക്ക്​ പരിക്കേറ്റു.[www.malabarflash.com]

ബുധനാഴ്​ച രാത്രി 9.30ഓടെയാണ്​ സംഭവം. കാലിന്​ പരിക്കേറ്റ എം.എൽ.എയെ സെന്റ്  ഫിലോമിനാസ്​ ആശുപത്രിയിൽ പ്രവേശിപ്പിച്ചു. ഹൊണ്ണാർപേട്ടിലെ പരിപാടിയിൽ പങ്കെടുക്കുന്നതിനിടെ എം.എൽ.എയുടെ സമീപത്ത്​  സ്​ഫോടനം നടക്കുകയായിരുന്നു.

സമീപത്തെ കെട്ടിടത്തി​ന്റെ പിറകുവശത്തുനിന്ന്​ പന്നിപ്പടക്കം പോലുള്ള വസ്​തു ആരോ എറിഞ്ഞെന്നാണ്​ സംശയിക്കുന്നത്​. സംഭവത്തിൽ രോഷാകുലരായ അനുയായികളെ സമാധാനപ്പെടുത്തിയ ശേഷമാണ്​ എം.എൽ.എ ആശുപത്രിയിൽ ചികിത്സ തേടിയത്​.

സംഭവമറിഞ്ഞ്​ വിവേക്​ നഗർ, അശോക്​ നഗർ എന്നീ സ്​റ്റേഷനുകളിൽനിന്ന്​ പോലീസ്​ കുതിച്ചെത്തി. എം.എൽ.എയുടെ പരിക്ക്​ സാരമുള്ളതല്ലെന്നാണ്​ വിവരം. സംഭവം നടന്ന സ്​ഥലത്തിന്​ സമീപത്തെ സി.സി.ടി.വി ദൃശ്യങ്ങളടക്കം പോലീസ്​ പരിശോധിച്ചുവരികയാണ്​​.  

അതേസമയം, ത​ന്റെ  പിതാവിനു നേരെ നടന്നത്​ ആസൂത്രിത ആക്രമണമാണെന്ന ആരോപണവുമായി എൻ.എ. ഹാരിസ്​ എം.എൽ.എയുടെ മകൻ മുഹമ്മദ്​ നാലപ്പാട്​ രംഗത്തുവന്നു. ഹൊണ്ണാർപേട്ടിൽ എം.ജി.ആറിന്റെ  ജന്മദിനാഘോഷ പരിപാടിയിലേക്കാണ്​ എം.എൽ.എയെ ക്ഷണിച്ചിരുന്നത്​. പരിപാടിയിൽ എം.എൽ.എക്കായി കസേര റിസർവ്​ ചെയ്​തിരുന്നെങ്കിലും അദ്ദേഹം മറ്റൊരു കസേരയിലാണ്​ ഇരുന്നത്​. പടക്കം പോലെയുള്ള വസ്​തു തന്റെ  പിതാവി​ന്റെ കാലിന്​ സമീപത്ത്​ വന്നുവീണ്​ പൊട്ടിത്തെറിക്കുകയായിരുന്നു. കാലിന്​ പരിക്കേറ്റ അദ്ദേഹം ഡോക്​ടർമാരുടെ നിരീക്ഷണത്തിലാണെന്നും മകൻ മുഹമ്മദ്​ നാലപ്പാട്​ പറഞ്ഞു.

തങ്ങൾക്കുനേരെ ഇത്തരമൊരു സംഭവം ആദ്യമായാണെന്നും ആക്രമണം മനഃപൂർവമാണെന്ന്​ സംശയിക്കുന്നതായും ഇതുസംബന്ധിച്ച്​ പോലീസിന്​ വിവരങ്ങൾ കൈമാറിയതായും മുഹമ്മദ്​ നാലപ്പാട്​ കൂട്ടിച്ചേർത്തു.

സംഭവമറിഞ്ഞ്​ ശിവാജി നഗർ എം.എൽ.എ റിസ്​വാൻ അർഷാദ്​ അടക്കമുള്ള നേതാക്കൾ ആശുപത്രിയിൽ എൻ.എ. ഹാരിസ്​ എം.എൽ.എയെ സന്ദർശിച്ചു. ബംഗളൂരു ഡി.സി.പി ചേതൻ സിങ്​ റാത്തോർ ആശുപത്രിയിലെത്തി എം.എൽ.എയിൽനിന്ന്​ വിവരങ്ങൾ തേടി.

കാസറകോട് കിഴൂർ സ്വദേശിയാണ് എൻ.എ. ഹാരിസ് എം.ൽ.എ.

No comments:

Post a Comment

Copyright © 2019 MALABAR FLASH | Design & Maintained by KSDM

Powered by Blogger.