കോഴിക്കോട്ട് നേരിയ ഭൂചലനം

കോഴിക്കോട്: ജില്ലയുടെ വിവിധ ഭാഗങ്ങളില്‍ രാത്രി പത്തരയ്ക്കും പതിനൊന്നുമണിക്കും ഇടയില്‍ ഭൂചലനമുണ്ടായി. ബേപ്പൂര്‍ , ചാലിയം, ഫറോക്ക്, പന്നിയങ്കര, കല്ലായി, തിരുവണ്ണൂര്‍, കടലുണ്ടി തുടങ്ങി ജില്ലയുടെ തീരപ്രദേശങ്ങളിലാണ് നേരിയ ഭൂചലനമുണ്ടായത്.
രാത്രി പതിനൊന്നു മണിയോടെ വലിയ മുഴക്കത്തോടെ ബേപ്പൂരിലും പരിസരപ്രദേശങ്ങളിലുമാണ് ഭൂചലനം ആദ്യം അനുഭവപ്പെട്ടത്. ചെറുവണ്ണൂര്‍, അരീക്കാട്, കണ്ണാട്ടിക്കുളം, കരുവന്‍തിരുത്തി, കുണ്ടായിത്തോട്, കോട്ടൂളി, ഫാറൂഖ് കോളേജ്, ചാലിയം, കല്ലംപാറ, ഈസ്റ്റ്ഹില്‍, കുണ്ടൂപ്പറമ്പ്, കണ്ണഞ്ചേരി എന്നിവിടങ്ങളിലും ഭൂചലനം ഉണ്ടായിട്ടുണ്ട്. വീടുകളിലെ ജനവാതിലുകളും ഫര്‍ണിച്ചറും ഇളകി. നാശനഷ്ടങ്ങള്‍ ഉണ്ടായിട്ടില്ല.
റിക്ടര്‍ സെ്കയിലില്‍ മൂന്നാണ് ഭൂചലനത്തിന്റെ തീവ്രത രേഖപ്പെടുത്തിയത്. രാമനാട്ടുകര വാഴയൂരില്‍നിന്ന് ഒരു കിലോമീറ്റര്‍ പടിഞ്ഞാറോട്ട് മാറിയാണ് പ്രഭവകേന്ദ്രം.