മാഡം ക്യൂറി' ഡോക്യുഫിക്ഷന് ഫിലിം ചേമ്പര്‍ അവാര്‍ഡ്

കാസര്‍കോട്: ദേശീയാടിസ്ഥാനത്തില്‍ നടത്തിയ ഹൃസ്വ ചിത്ര മത്സരത്തില്‍ ഏറ്റവും നല്ല വിദ്യാഭ്യാസ ഗവേഷണ പഠന ഡോക്യുഫിക്ഷന്‍ ചിത്രമായ 'മാഡം ക്യൂറിക്ക്' ഫിലിം ചേമ്പര്‍ അവാര്‍ഡ്. കണ്ണൂര്‍ ഫിലിം ചേമ്പറിന്റെ നേതൃത്വത്തില്‍ നടത്തിയ മത്സരത്തില്‍ നാല്‍പതിലധികം ഡോക്യുഫിക്ഷന്‍ ചിത്രങ്ങളില്‍ നിന്നുമാണ് 'മാഡം ക്യൂറി' ചിത്രം അവാര്‍ഡിനായി തിരഞ്ഞെടുത്തത്.
വളര്‍ന്നു വരുന്ന പ്രതിഭകള്‍ക്ക് സര്‍ഗാത്മഗതയും, ഗവേഷണ ത്വരയും ഉണ്ടാക്കുവാനായിരുന്നു ചിത്രം നിര്‍മ്മിച്ചത്. ബേക്കല്‍ ഗ്രീന്‍വുഡ് പബ്ലിക്ക് സ്‌കൂളിലെ കുട്ടികളും, അധ്യാപകരും, വിദേശ അധ്യാപകരുമാണ് ഇതില്‍ വേഷമിട്ടത്. കഴിഞ്ഞ രസതന്ത്രവര്‍ഷത്തില്‍ മാഡം ക്യൂറിയെ കുറിച്ച് ആദ്യമായാണ് കേരളത്തില്‍ ഇങ്ങനെ ഒരു ചിത്രം നിര്‍മ്മിച്ചത്.
കാന്‍സര്‍ രോഗത്തിനെതിരെ മാഡം ക്യൂറി കണ്ടെത്തിയ റേഡിയം എന്ന മൂലകത്തിന്റെ കണ്ടുപിടിത്തവുമായി ബന്ധപ്പെട്ട കഥയാണ് ഫിക്ഷനില്‍ അനാവരണം ചെയ്തത്. പ്രിന്‍സിപ്പാള്‍ എം.രാമചന്ദ്രന്‍കുറുപ്പ് നിര്‍മ്മിച്ച് അധ്യാപകനായ സജീവന്‍ വെങ്ങാട്ട് സംവിധാനം നിര്‍വ്വഹിച്ച ചിത്രത്തിന്റെ തിരക്കഥ തയ്യാറാക്കിയത് നാടന്‍ കലാ ഗവേഷകനും അധ്യാപകനുമായ ചന്ദ്രന്‍ മുട്ടത്താണ്. ക്യാമറ ഹരിപ്രസാദ് കാഞ്ഞങ്ങാട്. സ്‌കൂള്‍ മാനേജ്‌മെന്റിന്റെയും പി.ടി.എയുടെയും സഹകരണത്തിലാണ് ചിത്രം പൂര്‍ത്തീകരിച്ചത്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Mapappuram News