നോട്ടുമാല കഴുത്തിലണിഞ്ഞ രമേശ് ചെന്നിത്തലയ്‌ക്കെതിരേ റിസര്‍വ് ബാങ്കിന് പരാതി

കോഴിക്കോട്: റിസര്‍വ് ബാങ്കിന്റെ ക്ലീന്‍ നോട്ട് പോളിസിക്കു വിരുദ്ധമായി കറന്‍സി മാല കഴുത്തിലണിഞ്ഞ രമേശ് ചെന്നിത്തല എംഎല്‍എയ്‌ക്കെതിരേ നടപടി ആവശ്യപ്പെട്ടു പാലായിലെ മഹാത്മഗാന്ധി നാഷണല്‍ ഫൗണ്ടേഷന്‍ ചെയര്‍മാന്‍ എബി ജെ. ജോസ് റിസര്‍വ് ബാങ്കിനും കേന്ദ്ര ധനമന്ത്രാലയത്തിനും പരാതി നല്‍കി. 

കെപിസിസിയുടെ കേരളയാത്രയുടെ ഭാഗമായി നടക്കുന്ന സ്വീകരണയോഗങ്ങളിലാണു വ്യാപകമായി നോട്ടുമാല ഹാരമായി അണിയുന്നതെന്നു പരാതിയില്‍ പറയുന്നു. രാഷ്ട്രപിതാവിന്റെ ചിത്രമുള്ള കറന്‍സി നോട്ടുകള്‍ കഴുത്തിലണിയുന്ന നടപടി അദ്ദേഹത്തോടുള്ള അവഹേളനമാണ്.

1950ലെ ചിഹ്ന നാമ ആക്ട് അനുസരിച്ചു ഗാന്ധിജിയുടെ ചിത്രം ആലേഖനം ചെയ്തിട്ടുള്ള നോട്ടുകള്‍ ഹാരമായി അണിഞ്ഞ് അവഹേളിക്കുന്നതിനെതിരെ ശക്തമായ നടപടി സ്വീകരിക്കണം. 

ക്ലീന്‍നോട്ട് പോളിസിയുടെ ഭാഗമായി നോട്ടുകള്‍ പിന്‍ ചെയ്യുന്നത് റിസര്‍വ് ബാങ്ക് വിലക്കിയിട്ടുണ്ട്. ഇതിനു വിരുദ്ധമായി നോട്ടുകള്‍ തുളച്ചു നൂലുകളില്‍ കോര്‍ത്താണു നോട്ടുമാല തയ്യാറാക്കുന്നതെന്നു എബി പരാതിയില്‍ ചൂണ്ടിക്കാട്ടി. 

കറന്‍സിനോട്ടുകള്‍ മാലയായി അണിയുന്ന രാഷ്ട്രീയ പാര്‍ട്ടി നേതാക്കള്‍ അടക്കമുള്ള മുഴുവന്‍ ആളുകള്‍ക്കെതിരെയും നടപടി സ്വീകരിക്കണം. കറന്‍സിനോട്ടുകള്‍ മാലയാക്കുന്നത് ഒഴിവാക്കണമെന്നാവശ്യപ്പെട്ടു രാഷ്ട്രീയ പാര്‍ട്ടികള്‍ക്ക് കത്തയയ്ക്കുമെന്നും എബി. ജെ. ജോസ് അറിയിച്ചു. 2007ല്‍ എബി ജെ. ജോസ് നല്‍കിയ നിവേദനത്തെതുടര്‍ന്നാണു റിസര്‍വ് ബാങ്ക് ക്ലീന്‍ നോട്ട് പോളിസി തയാറാക്കിയത്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News