അധ്യാപകന്‍ പീഡിപ്പിച്ചതായി പരാതിപ്പെട്ട പെണ്‍കുട്ടി ആത്മഹത്യക്ക് ശ്രമിച്ചു

കൊല്ലം: തിരുവനന്തപുരം ലോ കോളേജ് അധ്യാപകന്റെ പീഡനത്തിനിരയായ പെണ്‍കുട്ടി ആത്മഹത്യക്ക് ശ്രമിച്ചു. ഗുരുതരാവസ്ഥയിലായ പെണ്‍കുട്ടിയെ കൊല്ലത്തെ സ്വകാര്യ ആശുപത്രിയില്‍ പ്രവേശിപ്പിച്ചു. സ്വകാര്യചാനലിലെ പരിപാടിയില്‍ മുഖം വെളിപ്പെടുത്തിയില്‍ മനംനൊന്താണ് ആത്മഹത്യക്കു ശ്രമിച്ചത്.

ലോകോളേജ് അധ്യാപകനായ പ്രൊഫസര്‍ കെ.ജെ രാജനാണ് പെണ്‍കുട്ടിയെ പീഡിപ്പിച്ചത്. തുടര്‍ന്ന് ഒരു സ്വകാര്യ ചാനലിലെ പരിപാടിയില് പെണ്‍കുട്ടി അഭിമുഖം നല്‍കിയിരുന്നു. എന്നാല്‍ പെണ്‍കുട്ടിയുടെ മുഖവും പേരും വെളിപ്പെടുത്തും വിധമായിരുന്നു ചാനല്‍ അഭിമുഖം സംപ്രേഷണം ചെയ്തതെന്ന് ബന്ധുക്കള്‍ ആരോപിച്ചു. പെണ്കുട്ടി നല്‍കിയ വിവരങ്ങള്‍ ഭാഗികമായും പ്രൊഫസര്‍ രാജന്റെ ഭാര്യയുടെ ന്യായീകരണം പൂര്‍ണ്ണമായും ചാനല്‍ നല്‍കിയെന്നും ആരോപിക്കുന്നു.

ഇത് പെണ്‍കുട്ടിക്ക് മാനസിക സംഘര്‍ഷത്തിനിടയാക്കി. ഇതാണ് ആത്മഹത്യ ചെയ്യാന്‍ പ്രേരിപ്പിച്ചത്. കൈത്തണ്ടയിലെ ഞരമ്പ് മുറിച്ചാണ് പെണ്‍കുട്ടി ആത്മഹത്യക്ക് ശ്രമിച്ചത്. പെണ്‍കുട്ടി അബോധാവസ്ഥയില്‍ തുടരുന്നതിനാല്‍ ആശുപത്രിയിലെത്തിയ കൊല്ലം സിജെഎമ്മിന് പെണ്‍കുട്ടിയുടെ മൊഴിയെടുക്കാനായില്ല.

പെണ്‍കുട്ടി നല്‍കിയ പരാതിയെ തുടര്‍ന്ന് അധ്യാപകനെ കഴിഞ്ഞ മാസം 24ന് ചാത്തന്നൂര് പോലീസ് അറസ്റ്റ് ചെയ്തിരുന്നു. വിവിധ ഇടങ്ങളില്‍ കൊണ്ടുപോയാണ് പീഡിപ്പിച്ചതെന്നാണ് കേസ്. പെണ്‍കുട്ടിയുടെ നഗ്‌നചിത്രങ്ങള്‍ ഇന്റര്‍നെറ്റ് വഴി പ്രചരിപ്പിക്കുമെന്ന് ഭീഷണിപ്പെടുത്തിയായിരുന്നു പീഡനം. ഇയാള്‍ ഇപ്പോള്‍ റിമാന്‍ഡിലാണ്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News