സ്കൈപ് ഉപയോഗത്തിന് യുഎഇയില്‍ നിയന്ത്രണം

അബൂദാബി: ഇന്റര്‍നെറ്റില്‍ വീഡിയോ കോളിങ് സാധ്യമാകുന്ന മൈക്രോസോഫ്റ്റിന്റെ "സ്കൈപ്" സോഫ്റ്റ്വെയര്‍ ഉപയോഗത്തിന് യുഎഇയില്‍ നിയന്ത്രണം. ലൈസന്‍സ് ഇല്ലാതെ സ്കൈപ്പിന്റെ വിവിധ സേവനം ഉപയോഗപ്പെടുത്തുന്നത് കുറ്റമാണെന്ന് യുഎഇ ടെലികമ്യൂണിക്കേഷന്‍ റെഗുലേറ്ററി അതോറിറ്റി (ടിആര്‍എ) അറിയിച്ചു.

ഇന്റര്‍നെറ്റില്‍നിന്നും ഡൗണ്‍ലോഡ് ചെയ്യുന്നുവെന്നത് സേവനങ്ങള്‍ ലൈസന്‍സ് ഇല്ലാതെ ഉപയോഗിക്കാനുള്ള അവകാശമല്ലെന്നും അധികൃതര്‍ വ്യക്തമാക്കി. സ്കൈപ് ഉപയോക്താക്കള്‍ക്ക് കംപ്യൂട്ടറില്‍ സൗജന്യമായി കണ്ടു സംസാരിക്കാം. വോയ്സ് ഓവര്‍ ഇന്റര്‍നെറ്റ് പ്രോട്ടോകോള്‍(വോയ്പ്) സേവനം ഉപയോഗിച്ച് സ്കൈപ്പില്‍നിന്നും ലാന്‍ഡ് ലൈനിലേക്കും മൊബൈലിലേക്കും കുറഞ്ഞനിരക്കില്‍ വിളിക്കാനുമാകും. ഇതിനാണ് നിയന്ത്രണം.

സ്കൈപ് നല്‍കുന്ന ഫോണ്‍കോള്‍ പോലുള്ള സേവനം ഉപയോഗിക്കണമെങ്കില്‍ ടിആര്‍എ ലൈസന്‍സ് വാങ്ങണം. ലൈസന്‍സ് ഇല്ലാതെ ഉപയോഗിക്കുന്നവര്‍ക്ക് രണ്ടുവര്‍ഷംവരെ തടവും 50,000 മുതല്‍ 10 ലക്ഷം ദിര്‍ഹം (ഒന്നരക്കോടിയോളം രൂപ) പിഴയും ചുമത്തുമെന്ന് റിപ്പോര്‍ട്ടുണ്ടായിരുന്നു. എന്നാല്‍, ശിക്ഷയെപ്പറ്റി തങ്ങള്‍ വ്യക്തമാക്കിയിട്ടില്ലെന്ന് അധികൃതര്‍ വിശദീകരിച്ചു.

സ്കൈപ് സര്‍വീസിന് നിയന്ത്രണമില്ലെന്നും എന്നാല്‍ ഈ സേവനം ഉപയോഗിക്കേണ്ടത് രാജ്യത്തെ അംഗീകൃത ടെലിഫോണ്‍ കമ്പനി മുഖേനയായിരിക്കണമെന്നും ടിആര്‍എ വ്യക്തമാക്കി. വോയ്പ് കോളിങ് കാര്‍ഡുകള്‍ മുഖേന കുറഞ്ഞ ചെലവില്‍ ഗള്‍ഫില്‍നിന്നും ഇന്ത്യ ഉള്‍പ്പെടെയുള്ള രാജ്യങ്ങളിലേക്ക് വിളിക്കാന്‍ കഴിയുന്നുണ്ട്. യുഎഇയില്‍ വോയ്പ് കോളിന് വിലക്കുണ്ട്. ഇതുകാരണം കംപ്യൂട്ടറില്‍നിന്ന് കംപ്യൂട്ടറിലേക്ക് കോള്‍ സാധ്യമാണെങ്കിലും മൊബൈലില്‍നിന്ന് മൊബൈലിലേക്കോ ലാന്‍ഡ്ലൈനിലേക്കോ വിളിക്കാനാകില്ല. ടെലിഫോണ്‍ കമ്പനികളായ എത്തിസലാത്തിനും ഡു വിനും വോയ്പ് സേവനം ഉപയോക്താക്കള്‍ക്ക് നല്‍കാന്‍ അനുവാദമുണ്ട്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News