എസ്.എസ്.എഫ് പ്രവര്‍ത്തകനെ അക്രമിച്ച കേസില്‍ അഞ്ചു പേര്‍ റിമാന്റില്‍

കാഞ്ഞങ്ങാട്: ഭീമനടി കുന്നുംകൈയില്‍ എസ് എസ് എഫ് പ്രവര്‍ത്തകനെ കഠാര കൊണ്ട് കുത്തിക്കൊലപ്പെടുത്താന്‍ ശ്രമിച്ച കേസില്‍ പ്രതികളായ നാലുപേരെ പോലീസ് അറസ്റ്റ് ചെയ്തു. 

എസ് കെ എസ് എസ് എഫ് പ്രവര്‍ത്തകരായ കുന്നുംകൈയിലെ ശിഹാബ്, നസറുദ്ദീന്‍, ബഷീര്‍, റാഷിദ് എന്നിവരെയാണ് വെള്ളരിക്കുണ്ട് സി ഐ എം വി അനില്‍ കുമാര്‍ അറസ്റ്റ് ചെയ്തത്.
ഈ കേസിലെ മറ്റൊരു പ്രതിയായ കുന്നുംകൈയിലെ നൗഫല്‍(21) ഹൊസ്ദുര്‍ഗ് ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ്(രണ്ട്) കോടതിയില്‍ കീഴടങ്ങി. അഞ്ച് പ്രതികളെയും കോടതി രണ്ടാഴ്ചത്തേക്ക് റിമാന്റ് ചെയ്തു. 

എസ് എസ് എഫിന്റെയും യൂത്ത് കോണ്‍ഗ്രസിന്റെയും പ്രവര്‍ത്തകനായ കുന്നുംകൈയിലെ ഷരീഫ് വാഴപ്പള്ളിയെ സംഘം ചേര്‍ന്ന് ആക്രമിക്കുകയും കഠാര കൊണ്ട് കുത്തിപ്പരിക്കേല്‍പ്പിക്കുകയും ചെയ്തതിന് വധശ്രമത്തിന് ആറുപേര്‍ക്കെതിരെയാണ് ചിറ്റാരിക്കാല്‍ പോലീസ് കേസെടുത്തത്. 

കേസിലെ പ്രതികളില്‍ ഒരാളായ അമീര്‍ ഇപ്പോഴും ഒളിവില്‍ കഴിയുകയാണ്. അമീറിനെ പിടികൂടുന്നതിന് പോലീസ് അന്വേഷണം ഊര്‍ജ്ജിതമാക്കിയിട്ടുണ്ട്. 

വയറിന് ആഴത്തില്‍ കുത്തേറ്റ നിലയില്‍ ഷരീഫ് വാഴപ്പള്ളി മംഗലാപുരം ആശുപത്രിയില്‍ ചികിത്സയിലാണ്.

കഴിഞ്ഞ ദിവസംവൈകുന്നേരം കുന്നുംകൈയില്‍ എസ് കെ എസ് എസ് എഫ് പ്രവര്‍ത്തകര്‍ നടത്തിയ പ്രകടനവുമായി ബന്ധപ്പെട്ട പ്രശ്‌നങ്ങളാണ് അക്രമത്തിലും കത്തിക്കുത്തിലും കലാശിച്ചത്. എസ് കെ എസ് എസ് എഫ് പ്രകടനത്തിനിടെ ഉണ്ടായ മോശമായ ചില പരാമര്‍ശങ്ങളെ ചോദ്യം ചെയ്ത വിരോധം മൂലമാണ് തന്നെ ആറംഗ സംഘം കഠാര കൊണ്ട് കുത്തിയതെന്ന് ഷരീഫ് പോലീസില്‍ മൊഴി നല്‍കുകയായിരുന്നു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News