മദ്യ ബ്രാന്‍ഡിനോട് ‘നോ’ പറഞ്ഞ് മാതൃകയായി പര്‍വേശ് റസൂല്‍

മുംബൈ: ജമ്മു കാശ്മീരിന്റെ ആദ്യ ഐപിഎല്‍ താരം പര്‍വേശ് റസൂല്‍ സഹകളിക്കാര്‍ക്ക് മാതൃകയാകുന്നു. തന്റെ ജേഴ്‌സിയില്‍ നിന്നും ഐപിഎല്ലിലെ സ്‌പോണ്‍സര്‍മാരിലൊരാളായ ഒരു പ്രമുഖ മദ്യ ബ്രാന്‍ഡിന്റെ ലോഗോ ഒഴിവാക്കിയാണ് പൂനെയുടെ ഈ യുവതാരം ശ്രദ്ധ നേടുന്നത്.

മതവികാരം കണക്കിലെടുത്താണ് ഇസ്ലാം മതവിശ്വാസിയായ പര്‍വേശ് റസൂല്‍ തന്റെ ജേഴ്സിയില്‍ നിന്നും മദ്യ ബ്രാന്‍ഡിന്റെ ലോഗോ നീക്കം ചെയ്തിരിക്കുന്നത്. കഴിഞ്ഞയാഴ്ച ഐപിഎല്ലില്‍ അരങ്ങേറ്റം കുറിച്ച റസൂലിന് ആദ്യം തന്റെ ജേഴ്‌സിയിലുണ്ടായിരുന്ന ലോഗോയെ കുറിച്ച് അറിവുണ്ടായിരുന്നില്ല. എന്നാല്‍ അത് ഒരു മദ്യ ബ്രാന്‍ഡിന്റേതാണെന്ന് തിരിച്ചറിഞ്ഞ ഉടന്‍ തന്നെ അത് ജേഴ്‌സിയില്‍ നിന്ന് നീക്കം ചെയ്യാന്‍ റസൂല്‍ തന്റെ ടീം മാനേജ്‌മെന്റിനെ സമീപിക്കുകയായിരുന്നു.

ഇത് ആദ്യമല്ല ഒരു ക്രിക്കറ്റ് താരം മതവികാരം കണക്കിലെടുത്ത് മദ്യത്തിന്റെ ഉപഭോഗം വര്‍ദ്ധിപ്പിക്കുന്ന പ്രചാരണത്തിനെതിരെ രംഗത്തെത്തുന്നത്. ദക്ഷിണാഫ്രിക്കന്‍ ബാറ്റിംഗ് താരം ഹാഷിം അംലയാണ് സമാനമായ നടപടിയിലൂടെ പ്രശസ്തനായ മറ്റൊരു ക്രിക്കറ്റര്‍. ദക്ഷിണാഫ്രിക്കന്‍ ടീമിന്റെ ഔദ്യോഗിക സ്‌പോണ്‍സറായ മദ്യ ബ്രാന്‍ഡിന്റെ ലോഗോ തന്റെ ജേഴ്‌സിയില്‍ നിന്നും മാറ്റുന്നതുവരെ കളിക്കാന്‍ വിസമ്മതിച്ച അംല അവസാനം ലോഗോ നീക്കിയതിന് ശേഷമാണ് കളിക്കാന്‍ തയ്യാറായത്.

(INDIAVISION)

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News.