വി.എസിനെ പ്രതിപക്ഷ നേതൃസ്ഥാനത്തു നിന്ന് മാറ്റില്ല -കാരാട്ട്

ന്യൂദല്‍ഹി: വി.എസ് അച്യുതാനന്ദനെ പ്രതിപക്ഷ നേതൃസ്ഥാനത്തു നിന്ന് മാറ്റില്ലെന്ന് സി.പി.എം ജനറല്‍ സെക്രട്ടറി പ്രകാശ് കാരാട്ട് വ്യക്തമാക്കി. വി.എസ് പ്രതിപക്ഷ നേതാവായി തുടരുമെന്നും കേരളത്തിലെ സി.പി.എം ഒറ്റക്കെട്ടായി നില്‍ക്കണമെന്നും അദ്ദേഹം ആവശ്യപ്പെട്ടു. കേരളത്തില്‍ ഐക്യത്തോടെ മുന്നോട്ട് പോയി നേട്ടമുണ്ടാക്കാന്‍ പാര്‍ട്ടിക്കും എല്‍.ഡി.എഫിനും കഴിയണമെന്നും അദ്ദേഹം പറഞ്ഞു. സംസ്ഥാനത്തെ പാര്‍ട്ടിയിലെ പ്രശ്നങ്ങള്‍ പഠിക്കാന്‍ ആറംഗ കമ്മിറ്റിയെ പി.ബി നിയോഗിച്ചു. റിപ്പോര്‍ട്ട് നല്‍കാന്‍ സമയ പരിധി നിശ്ചയിച്ചിട്ടില്ല.

കഴിഞ്ഞ മൂന്നു ദിവസങ്ങളായി നടന്ന പൊളിറ്റ് ബ്യൂറോ, കേന്ദ്രകമ്മിറ്റി യോഗങ്ങളുടെ തീരുമാനം വാര്‍ത്താ സമ്മേളനത്തില്‍ ഔദ്യോഗികമായി അറിയിക്കുകയായിരുന്നു പ്രകാശ് കാരാട്ട്.

ടി.പി ചന്ദ്രശേഖരന്‍ വധത്തെക്കുറിച്ചുള്ള പാര്‍ട്ടിയുടെ അന്വേഷണം പൂര്‍ത്തിയായെന്ന് കാരാട്ട് അറിയിച്ചു. കോടതി നടപടികള്‍ തുടരുന്നതിനാലാണ് വിവരങ്ങള്‍ പുറത്തു വിടാത്തതെന്നും കാരാട്ട് വ്യക്തമാക്കി.

വി.എസിന്റെ പേഴ്സനല്‍ സ്റ്റാഫിലെ മൂന്നു പേര്‍ക്കെതിരായ നടപടി കേന്ദ്ര കമ്മിറ്റി ശരിവെച്ചു. വി.എസിന്റെ വിശ്വസ്തര്‍ക്ക് തല്‍സ്ഥാനത്ത് തുടരാനാവില്ലെന്നും അവരെ നിയമിച്ചത് പാര്‍ട്ടിയാണെന്നും കാരാട്ട് വിശദീകരിച്ചു.

ദേശാഭിമാനി മുന്‍ ഉദ്യോഗസ്ഥന്‍ എസ്.പി ശ്രീധരനെതിരായ സംസ്ഥാന കമ്മിറ്റിയുടെ അച്ചടക്ക നടപടിയും കേന്ദ്രകമ്മിറ്റി അംഗീകരിച്ചിട്ടുണ്ട്. ദേശാഭിമാനി മാനേജര്‍ വരദരാജനെതിരെ ആരോപണം ഉന്നയിച്ചതിനായിരന്നു എസ്.പി ശ്രീധരനെതിരെ നടപടിയെടുത്തിരുന്നത്.

അതേസമയം, രാജ്യത്ത് വധശിക്ഷ നിരോധിക്കണമെന്നും അത്യപൂര്‍വ്വ കേസുകളില്‍ ജീവിതാന്ത്യം വരെ തടവുശിക്ഷ നല്‍കാമെന്നും സി.പി.എം ആവശ്യപ്പെട്ടു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News, VS Achudanandan, Prakash Karatte