Latest News

ക്വട്ടേഷന്‍ നല്‍കി ചേച്ചിയെ കൊന്ന സ്ത്രീയും കൊലപാതകിയും അറസ്റ്റില്‍


മംഗലാപുരം:സ്വത്തുതര്‍ക്കത്തിന്റെ പേരില്‍ സ്വന്തം ചേച്ചിയെ ക്വട്ടേഷന്‍ നല്‍കി കൊല്ലിച്ച അനിയത്തി അറസ്റ്റിലായി. ഒന്നരമാസം മുമ്പ് കൊന്നു കാട്ടില്‍ കുഴിച്ചുമൂടിയ സഹോദരിയുടെ മൃതദേഹാവശിഷ്ടങ്ങള്‍ പോലീസ് കണ്ടെടുത്തു. കൊലയാളിയെയും പിടികൂടി.

കുന്താപുരം ഗോലിഹോളിലാണ് നാടിനെ അമ്പരപ്പിച്ച സംഭവം. മൈതേരിയില്‍ താമസിക്കുന്ന പ്രേമ എന്ന തുംഗയാണ് കൊല്ലപ്പെട്ടത്. അനുജത്തി ശിങ്കാരിയെയാണ് പോലീസ് അറസ്റ്റ് ചെയ്തത്. ഇരുവരും ഒരു വീട്ടിലായിരുന്നു താമസം. ശിങ്കാരിയുടെ ഭര്‍ത്താവിന് മുംബൈയില്‍ ഹോട്ടല്‍ ബിസിനസ്സാണ്. തുംഗയുടെ ഭര്‍ത്താവിന് കൂലിപ്പണിയും. സ്വത്തിന്റെ പേരില്‍ സഹോദരിമാര്‍ തമ്മില്‍ നിരന്തരം വഴക്കുണ്ടായിരുന്നതായി പോലീസ് പറഞ്ഞു. കുടുംബസ്വത്തിന്റെ പേരിലുള്ള കേസ് കോടതിയില്‍ കാലങ്ങളായി നടക്കുകയാണ്.

ഇതിനിടയിലാണ് തുംഗയെ കഴിഞ്ഞ ഏപ്രില്‍ 24 മുതല്‍ കാണാതാവുന്നത്. 25ന് കാണാനില്ലെന്ന പരാതി ബൈന്ദൂര്‍ പോലീസില്‍ ലഭിച്ചു. പോലീസ് അന്വേഷണം നടത്തിയങ്കിലും കണ്ടെത്താനായില്ല. ഇതിനിടയില്‍ തുംഗയുടെ എട്ടാം ക്ലാസില്‍ പഠിക്കുന്ന മകള്‍ പോലീസിനോട് അമ്മയെ കൊലപ്പെടുത്തിയതാണെന്ന് പറഞ്ഞിരുന്നുവെങ്കിലും പോലീസ് അത് കാര്യമായെടുത്തില്ല.

ചോദ്യംചെയ്യലിന്റെ ഭാഗമായി ഇവരുടെ അയല്‍വാസിയും ചില മോഷണക്കേസുകളിലും ക്രിമിനല്‍ കേസുകളിലും പ്രതിയുമായ ആനന്ദ് നായിക്കിനെയും ചോദ്യംചെയ്തിരുന്നു. തെളിവൊന്നും കിട്ടാത്തതിനാല്‍ വെറുതെ വിട്ടു. തുടര്‍ന്ന് നാട്ടുകാരില്‍ ചിലര്‍ തുംഗയും ആനന്ദും ഒരുമിച്ച് ബസ്സില്‍ പോകുന്നത് കണ്ടതായി പറഞ്ഞതിനെത്തുടര്‍ന്ന് പോലീസ് ആനന്ദിനെ, മൊബൈല്‍ ഫോണ്‍ പിന്തുടര്‍ന്ന് പിടികൂടി. വീണ്ടും ചോദ്യംചെയ്തപ്പോഴാണ് ഞെട്ടിക്കുന്ന രഹസ്യങ്ങള്‍ വെളിവായത്.

കേസ് നീണ്ടുപോയാല്‍ തനിക്ക് സ്വത്ത് കിട്ടില്ലെന്നു ബോധ്യമായ ശിങ്കാരി ഭര്‍ത്താവിന്റെ സഹോദരനുമൊത്താലോചിച്ച് തുംഗയെ കൊല്ലാന്‍ ആനന്ദ് നായിക്കിന് ക്വട്ടേഷന്‍ നല്‍കുകയായിരുന്നു. അമ്പതിനായിരം രൂപയ്ക്കാണ് ആനന്ദ് ക്വട്ടേഷന്‍ ഏറ്റത്. 25,000 രൂപ അഡ്വാന്‍സായി നല്‍കി, ബാക്കി കൊലപാതകത്തിനു ശേഷം നല്‍കാമെന്നാണു പറഞ്ഞിരുന്നതെങ്കിലും ഇതുവരെ തന്നിട്ടില്ലെന്ന് ആനന്ദ് പറഞ്ഞു. കൊലപാതകത്തിനു ശേഷം മൃതദേഹം ബൈന്ദൂര്‍ ചാര്‍സല്‍ കാട്ടില്‍ കുഴിച്ചിട്ടു.

ആനന്ദിന്റെ മൊഴിപ്രകാരം പോലീസ് ശിങ്കാരിയെയും ഭര്‍തൃസഹോദരനായ രാഘവേന്ദ്രയെയും അറസ്റ്റ് ചെയ്യുകയായിരുന്നു. തുംഗയുടെ മൃതദേഹാവശിഷ്ടങ്ങള്‍ പോലീസ് കാട്ടില്‍നിന്നു കണ്ടെടുത്തു. അസ്ഥികൂടം മാത്രമായിരുന്നു ബാക്കിയുണ്ടായിരുന്നത്. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.



Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News

No comments:

Post a Comment

Copyright © 2019 MALABAR FLASH | Design & Maintained by KSDM

Powered by Blogger.