ഉദുമ: വെളളിയാഴ്ച വൈകുന്നേരം ഉദുമ ടൗണില്‍ യുവാക്കളുടെ തെരുവ് യുദ്ധം. അക്രമത്തില്‍ നിരവധി പേര്‍ക്ക് പരിക്ക്, ആറ് മാസം മുമ്പ് ഉദുമയ്ക്കടുത്ത ഒരു വിദ്യാര്‍ത്ഥിനിയോട് പ്രണയാഭ്യാര്‍ത്ഥന നടത്തിയ യുവാവിനെ യുവതിയുടെ സഹേദരന്‍ ചോദ്യം ചെയ്ത സംഭവനത്തിന്റെ തുടര്‍ച്ചയാണ് വെളളിയാഴ്ച വൈകുന്നേരം 5 മണിയോടെ രണ്ട് പ്രദേശങ്ങളില്‍ നിന്നും സംഘടിച്ചെത്തിയ യുവാക്കളുടെ തെരുവ് യുദ്ധത്തിന് ഉദുമ ടൗണ്‍ സാക്ഷ്യം വഹിച്ചത്.
ഉദുമ പടിഞ്ഞാറിലെയും പാക്യാരയിലെയും യുവാക്കളാണ് മാരകായുധങ്ങളുമായി ഉദുമയില്‍ ഏററുമുട്ടിയത്. സംഘര്‍ഷം രൂക്ഷമായതോടെ ഒരു വിഭാഗം റെയില്‍വേ ട്രാക്കില്‍ കയറി ശക്തമായ കല്ലേറ് ആരംഭിച്ചു. ഇതോടെ സ്‌കൂള്‍ വിട്ട് വരുന്ന വിദ്യാര്‍ത്ഥികളും ബസ്സ് കാത്തുനില്‍ക്കുകയായിരുന്ന സ്ത്രീകളടക്കമുളളവരും നിലവിളിച്ചോടി. ഇതുവഴി പോവുകയായിരുന്ന നിരവധി വാഹനങ്ങള്‍ക്കും കല്ലേറില്‍ കേടുപാട്പററി. സംഭവമറിഞ്ഞ് സ്ഥലത്തെത്തിയ ബേക്കല്‍ എസ്.ഐ എം.പി രാജേഷിന്റെ നേതൃത്വത്തിലുളള പോലീസ് സംഘം അക്രമികളെ വിരട്ടിയോടിച്ചതോടെയാണ് അരമണിക്കൂറോളം നീണ്ട തെരുവ് യുദ്ധം അവസാനിച്ചത്. അക്രമി സംഘത്തില്‍പ്പെട്ട ഒരു യുവാവിനെ പോലീസ് കസ്റ്റഡിയിലെടുത്തിട്ടുണ്ട്. പരിക്കേററ രണ്ട് പേരെ കാസര്‍കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചു.
അതിനിടെ പ്രശ്‌നം രമ്യമായി തീര്‍ക്കാനായി രണ്ട് പ്രദേശത്തെയും പൗരപ്രമുഖരുടെ നേതൃത്വത്തില്‍ വെളളിയാഴ്ച രാത്രി വൈകിയും ചര്‍ച്ചകള്‍ നടക്കുന്നുണ്ട്‌.
Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News
No comments:
Post a Comment