എട്ടുപേരുടെ മരണത്തിനിടയാക്കിയ കൊലയാളി ബസ് ഇതുവരെ ഇടിച്ചുകൊന്നത് ഇരുപതോളം പേരെ

മലപ്പുറം: മലപ്പുറത്ത് ഒരു കുടുംബത്തിലെ എട്ടുപേരുടെ മരണത്തിനിടയാക്കിയ ബസിനെതിരെ വ്യാപകആരോപണങ്ങളാണ് ഉതിരുന്നത്. ഈ ബസ് ഉണ്ടാക്കിയ വിവിധ അപകടങ്ങളില്‍ ഇതുവരെ ഇരുപതോളം പേര്‍ മരിച്ചുവെന്നതാണ് പ്രധാന ആരോപണം.

കഴിഞ്ഞ വര്‍ഷം മലപ്പുറം താനൂരില്‍ തന്നെ രണ്ടുപേര്‍ ഈ ബസ് ഇടിച്ച് മരിച്ചിരുന്നു. കോഴിക്കോട് മീഞ്ചന്തയിലെ വെയ്റ്റിംഗ് ഷെഡിലേക്ക് പാഞ്ഞുകയറി ഇതേ ബസ് രണ്ടുപേരെ കൊലപ്പെടുത്തി. പിന്നീട് മലപ്പുറം തിരൂരില്‍ ബൈക്ക് യാത്രികനായ നൗഫലും നടുവക്കുടിയില്‍ കാല്‍നടയാത്രക്കാരനും ഈ ബസിന്റെ അമിത വേഗതയില്‍ ജീവന്‍ നഷ്ടമായി.

ഓരോ അപകടത്തിന് ശേഷവും ബസിന്റെ പെര്‍മിറ്റ് അധികൃതര്‍ റദ്ദാക്കാറുണ്ട്. മറ്റൊരുപേരില്‍ പെര്‍മിറ്റ് വാങ്ങിയാണ് ബസ് ഉടമകള്‍ പിന്നീട് സര്‍വ്വീസ് നടത്താറ്. ഈ ബസിന്റെ മരണപ്പാച്ചില്‍ മേഖലയില്‍ കുപ്രസിദ്ധമാണ്. അതുകൊണ്ടുതന്നെയാണ് നാട്ടുകാര്‍ അപകടത്തിന് ശേഷം രോക്ഷാകുലരായതും ബസ് കത്തിച്ചതും.

കോഴിക്കോട് – തിരൂര്‍ റൂട്ടില്‍ സാധാരണ ബസുകളുടെ റണ്ണിംഗ് ടൈം ഒന്നര മണിക്കൂറാണ്. പക്ഷേ, ഈ ബസ് അമ്പത് മിനിറ്റുകൊണ്ടാണ് ഓട്ടം പൂര്‍ത്തിയാക്കുകയെന്നാണ് മറ്റ് ബസുകാര്‍ ഉള്‍പ്പടെയുള്ളവരുടെ ആരോപണം. ഇക്കാര്യം അധികൃതരുടെ ശ്രദ്ധയില്‍ പെട്ടെങ്കിലും അവര്‍ അനങ്ങാപ്പാറ നയം സ്വീകരിച്ചെന്നാണ് മറ്റ് ബസ് ജീവനക്കാരും പറയുന്നത്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News, Malappuram, Accident, Bus, Autoriksha