റിമ ആഷിക് വിവാഹം നവംബര്‍ ഒന്നിന് കാക്കനാട് സബ് രജിസ്ട്രാര്‍ ഓഫീസില്‍

കൊച്ചി: ഏറെക്കാലമായി പ്രണയത്തിലായിരുന്ന സംവിധായകന്‍ ആഷിക് അബുവും നടി റിമ കല്ലിങ്കലും നവംബര്‍ ഒന്നിന് വിവാഹിതരാകും. ഇരുവരുടെയും വിവാഹം നവംബറില്‍ നടക്കുമെന്ന് നേരത്തെ വാര്‍ത്തകളുണ്ടായിരുന്നെങ്കിലും ആഷിക് അബുവാണ് മാധ്യമപ്രവര്‍ത്തകരോട് വിവാഹ തീയതി സ്ഥിരീകരിച്ചത്.

കൊച്ചി കാക്കനാട് സബ് രജിസ്ട്രാര്‍ ഓഫീസില്‍ വെച്ച് ഇരുവരും പരസ്പരം രക്തഹാരമണിയിക്കും. അടുത്ത ബന്ധുക്കളും സുഹൃത്തുക്കളും ചേര്‍ന്നുള്ള ലളിതമായ ചടങ്ങായിരിക്കുമെന്നും ആഷിക് അറിയിച്ചു.

22 ഫീമെയില്‍ കോട്ടയം എന്ന ആഷിക് അബു ചിത്രത്തില്‍ നായികയായെത്തിയതോടെയാണ് റിമയും ആഷികും തമ്മില്‍ പ്രണയത്തിലായത്. ഇരുവരുടെയും പ്രണയവാര്‍ത്ത മാധ്യമങ്ങളിലൂടെ പുറത്തുവന്നതോടെ തങ്ങളുടെ പ്രണയും ആഷികും റിമയും തുറന്നു പറയുകയായിരുന്നു.

രണ്ടു മതസ്ഥരാണെങ്കിലും തങ്ങളുടെ പ്രണയത്തിനോ കുടുംബ ജീവിതത്തിനോ അതു ബാധിക്കില്ലെന്നും ഇരുവരും വ്യക്തമാക്കിയിരുന്നു. എന്തായാലും പ്രേക്ഷകരുടെ പ്രിയ സംവിധായകനും നടിയും ഒന്നാകുന്നതിന്റെ സന്തോഷത്തിലാണ് ആരാധകരും. ഇരുവര്‍ക്കും സന്തോഷകരമായൊരു ജീവിതം ആശംസിക്കാനും അവര്‍ മറക്കുന്നില്ല.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News