ചന്ദ്രലേഖ വിദേശത്തേക്ക് പറക്കാനുള്ള ഒരുക്കത്തില്‍

യുട്യൂബ് ഗായിക ചന്ദ്രലേഖ ദുബായിലേക്ക് പറക്കാനുള്ള ഒരുക്കത്തിലാണ്. പ്രവാസി മലയാളി സംഘടനകളുടെ ക്ഷണം സ്വീകരിച്ചാണ് ചന്ദ്രലേഖ ഗള്‍ഫിലേക്ക് എത്തുക. യുട്യൂബിലും ഫേസ്ബുക്കിലും ചന്ദ്രലേഖയെ പ്രോത്സാഹിപ്പിക്കുന്നതില്‍ പ്രവാസിമലയാളികള്‍ വലിയ പങ്കാണ് വഹിച്ചത്.

വിദേശ രാജ്യങ്ങളിലേക്കുള്ള സന്ദര്‍ശനം വിദൂര സ്വപ്‌നത്തില്‍ പോലുമില്ലാതിരുന്ന സാധാരണ വീട്ടമ്മയായിരുന്നു ചന്ദ്രലേഖ. അതുകൊണ്ടുതന്നെ ചന്ദ്രലേഖക്കോ കുടുംബത്തിനോ പാസ്‌പോര്‍ട്ട് ഇല്ലായിരുന്നു. കഴിഞ്ഞ ദിവസം കൊല്ലം പാസ്‌പോര്‍ട്ട് സേവാ കേന്ദ്രത്തിലെത്തിയാണ് ചന്ദ്രലേഖയും ഭര്‍ത്താവ് രഘുനാഥ്, മകന്‍ ശ്രീഹരിയും പാസ്‌പോര്‍ട്ടിന് അപേക്ഷ നല്‍കിയിരിക്കുന്നത്. അടുക്കളയില്‍ മകനെ എടുത്തുകൊണ്ട് ‘രാജഹംസമേ… എന്ന ഗാനം ആലപിച്ചത് യുട്യൂബിലും ഫേസ്ബുക്കിലും വൈറലായി പ്രചരിച്ചതോടെയാണ് ചന്ദ്രലേഖ മലയാളികള്‍ക്കു സുപരിചിതയായത്.

പറക്കോട് ബന്ധുവീട്ടില്‍വച്ച് കഴിഞ്ഞവര്‍ഷം ഓണത്തിനാണ് ചന്ദ്രലേഖ ഇത് ആലപിച്ചത്. ഭര്‍ത്താവ് രഘുവിന്റെ അപ്പച്ചിയുടെ മകന്‍ ദര്‍ശന്‍ ഇത് മൊബൈലില്‍ പകര്‍ത്തി യുട്യൂബിലിട്ടത്. ഈ വീഡിയോ യുട്യൂബില്‍ ഇത് വന്ന് ഒരു കൊല്ലമായെങ്കിലും ഫേസ്ബുക്കില്‍ ചര്‍ച്ചയായതോടെയാണ് സംഭവം ഹിറ്റായത്. ഇത് സത്യമോ എന്ന പേരില്‍ പലരും അഭിപ്രായപ്പെട്ടപ്പോള്‍ ചന്ദ്രലേഖയുടെ മറ്റൊരു ബന്ധുവായ ബിജു മൊബൈല്‍ നമ്പര്‍ ചേര്‍ത്തതോടെ കഥമാറി. നിരവധി എഫ്.എം ചാനലുകളും പത്രദൃശ്യമാധ്യമങ്ങളും ചന്ദ്രലേഖയുടെ പാട്ട് വാര്‍ത്തയാക്കി.

നാലു ലക്ഷത്തോളം പേരാണ് യൂട്യൂബില്‍ ഈ ഗാനം ഇതുവരെ കേട്ടത്. തുടര്‍ന്ന് എം.പ്രശാന്ത് സംവിധാനം ചെയ്യുന്ന ലവ് സ്‌റ്റോറി എന്ന സിനിമയ്ക്കു വേണ്ടി പാടാനുള്ള അവസരവും ഈ മുപ്പത്തിമൂന്നുകാരിയെ തേടിയെത്തി. ശ്രേയ ഘോഷാലിന് വേണ്ടി ഒരുക്കിയ ഗാനമാണ് ചന്ദ്രലേഖക്ക് സംഗീത സംവിധായകന്‍ എം.ജയചന്ദ്രന് നല്‍കിയത്. ചന്ദ്രലേഖയുടെ ഫേസ്ബുക്ക് പേജിനും മണിക്കൂറുകള്‍ക്കുള്ളില്‍ ഒരു ലക്ഷത്തിലേറെ ലൈക്കുകള്‍ ലഭിച്ചു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News, Singer, Chandralekha