രാജഹംസമേ പാടിയ ചന്ദ്രലേഖയ്ക്ക് സിനിമയില്‍ പാടാന്‍ അവസരം

കൊച്ചി: ഭര്‍ത്താവിന്റെ സഹോദരന്‍ മൊബൈല്‍ ഫോണില്‍ റെക്കോര്‍ഡ് ചെയ്ത് യു ട്യൂബിലിട്ട ‘രാജഹംസമേ’ എന്ന ഒറ്റ ഗാനത്തിലൂടെ പ്രശസ്തയായ ചന്ദ്രലേഖയ്ക്ക് സിനിമയില്‍ പാടാന്‍ അവസരം. ഒരു ചാനലിലൂടെ പാട്ടുകേള്‍ക്കാനിടയായ മൂന്നു സംവിധായകര്‍ തങ്ങളുടെ അടുത്ത ചിത്രത്തില്‍ പാടാന്‍ ചന്ദ്രലേഖയ്ക്ക് അവസരം നല്‍കാമെന്ന് വാഗ്ദാനം നല്‍കിയിരിക്കുകയാണ്.

ബിജിപാല്‍, രതീഷ് വേഗ, റോണി റാഫേല്‍ എന്നീ സംവിധായകരാണ് ചന്ദ്രലേഖയ്ക്ക് പിന്നണി ഗായികയാകാനുള്ള അവസരമൊരുക്കുക. ചിത്ര, ലതിക തുടങ്ങിയ ഗായികമാര്‍ ചന്ദ്രലേഖയുടെ പാട്ടിനെ അഭിനന്ദിക്കുകയും ചെയ്തു.

ഒരു വര്‍ഷം മുന്‍പാണ് വീട്ടമ്മയായ ചന്ദ്രലേഖയുടെ പാട്ട് ഭര്‍തൃസഹോദരന്‍ യൂ ട്യൂബിലിട്ടതെങ്കിലും കഴിഞ്ഞ രണ്ടു മൂന്നു ദിവസമായി ഫേസ്ബുക്കിലൂടെയുള്ള പ്രമോഷനാണ് ഗായികയെ പ്രശസ്തയാക്കിയത്. വൈക്കം വിജയലക്ഷ്മി പാടിയ കാറ്റേ കാറ്റേ എന്ന ഗാനത്തിനുശേഷം സോഷ്യല്‍ സൈറ്റില്‍ ഇത്രയും ഹിറ്റായ ഗാനം ഉണ്ടായിട്ടില്ല.

കുടുംബ പ്രാരാബ്ദങ്ങള്‍ക്കിടയില്‍ പാട്ടു പഠിക്കാനൊന്നും അവസരം ലഭിക്കാതിരുന്ന ചന്ദ്രലേഖ നേരത്തെ ഒരു ഗാനമേള ട്രൂപ്പില്‍ പാടാന്‍ പോകുമായിരുന്നെങ്കിലും വിവാഹശേഷം കുടുംബിനിയായി ഒതുങ്ങിക്കഴിയുകയായിരുന്നു. അതിനിടയിലാണ് ഗാനം യു ട്യൂബിലെത്തുന്നതും ചന്ദ്രലേഖ ശ്രദ്ധിക്കപ്പെടുന്നതും.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News