ചെങ്കല്ലുസമരം തുടരും എം.എല്‍.എ. വിളിച്ചുചേര്‍ത്ത യോഗത്തിലും തീരുമാനമായില്ല

പടന്ന: ഒരു മാസക്കാലമായി ചെങ്കല്ലുമേഖലയിലെ വിലവര്‍ധനയുമായി ബന്ധപ്പെട്ട് നിലനില്ക്കുന്ന പ്രതിസന്ധി പരിഹരിക്കാന്‍ കെ.കുഞ്ഞിരാമന്‍ എം.എല്‍.എ. വിളിച്ചുചേര്‍ത്ത യോഗത്തിലും പരിഹാരമായില്ല. 

ഒക്ടോബര്‍ 25ന് കളക്ടര്‍ പി.എസ്.മുഹമ്മദ്‌സഗീര്‍, എം.എല്‍.എ. എന്നിവരുടെ സാന്നിധ്യത്തില്‍ ലോറി അസോസിയേഷന്‍ ഭാരവാഹികളുടെയും ചെങ്കല്ല് ഗുണഭോക്താക്കളുടെയും യോഗത്തില്‍ ഉണ്ടാക്കിയ തീരുമാനം നടപ്പാകാത്തതിനെത്തുടര്‍ന്നാണ് എം.എല്‍.എ. യോഗം വിളിച്ചുചേര്‍ത്തത്. കളക്ടറുടെ സാന്നിധ്യത്തില്‍നടന്ന ഉപസമിതിയോഗത്തില്‍ 1000 കല്ലിന് 3000രൂപ തോതിലുള്ള വര്‍ധനയായിരുന്നു തീരുമാനിച്ചത്. എന്നാല്‍, ഈ തീരുമാനം നടപ്പില്‍വരുത്താന്‍ ലോറി അസോസിയേഷന്‍ തയ്യാറായില്ല. 

വ്യാഴാഴ്ച നടന്ന യോഗത്തില്‍ കളക്ടര്‍ പ്രഖ്യാപിച്ച ഒത്തുതീര്‍പ്പ് വിലയേക്കാള്‍ 500 രൂപ വര്‍ധിപ്പിക്കാന്‍ ചെങ്കല്ല് ഉപഭോക്തൃസമിതി തയ്യാറായെങ്കിലും 1500രൂപ വര്‍ധിപ്പിക്കണമെന്ന ആവശ്യത്തില്‍ ലോറി അസോസിയേഷന്‍ ഭാരവാഹികള്‍ ഉറച്ചുനിന്നു. യോഗത്തില്‍ ചെറുവത്തൂര്‍ പഞ്ചായത്ത് പ്രസിഡന്റ് സി.കാര്‍ത്ത്യായനി, പടന്ന പഞ്ചായത്ത് പ്രസിഡന്റ് സി.കുഞ്ഞിക്കൃഷ്ണന്‍ ,സത്താര്‍ വടക്കുമ്പാട്, ഉസ്മാന്‍ പാണ്ട്യാല, പി.വി.മുഹമ്മദ് അസ്‌ലം, വി.വി.ഉത്തമന്‍, എന്‍.കെ.ഹമീദ് ഹാജി, എം.അബ്ദുല്‍സലാം, വി.നാരായണന്‍, കെ.കെ.ബാലചന്ദ്രന്‍, മാമുനി രവി, നീലഗിരി ലത്തീഫ്, ഒ.ടി.അഹമ്മദ്ഹാജി, ലോറി അസോസിയേഷന്‍ ഭാരവാഹികളായ സി.കെ.ചന്ദ്രന്‍, കെ.രാജന്‍ എന്നിവര്‍ പങ്കെടുത്തു.

കഴിഞ്ഞ ഒരുമാസമായി തുടരുന്ന സമരത്തെത്തുടര്‍ന്ന് നിര്‍മാണമേഖലയില്‍ തൊഴിലാളികളടക്കമുള്ളവര്‍ കടുത്ത പ്രതിസന്ധി നേരിടുകയാണ്. ചെങ്കല്ല്‌മേഖലയിലെ പ്രതിസന്ധി നീണ്ടുപോകുന്നത് നാട്ടുകാര്‍ക്കും ബുദ്ധിമുട്ടായിട്ടുണ്ട്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News