ചിക്കമഗളൂരില്‍ ഇരുവിഭാഗങ്ങള്‍ തമ്മില്‍ സംഘര്‍ഷം; ലാത്തിച്ചാര്‍ജ്

മംഗലാപുരം: ചിക്കമഗളൂരില്‍ ഇരുവിഭാഗങ്ങള്‍ തമ്മിലുണ്ടായ സംഘര്‍ഷത്തില്‍ നാലുപേര്‍ക്ക് പരുക്കേറ്റു. ചിക്കമഗളൂര്‍ നഗരത്തിനു സമീപമുള്ള ദര്‍ഗയ്ക്ക് അടുത്ത് പന്നിയുടെ തല കണ്ടതിനെ തുടര്‍ന്നാണ് ഇരുവിഭാഗങ്ങള്‍ തമ്മില്‍ ഏറ്റുമുട്ടലുണ്ടായത്.

ദര്‍ഗയില്‍രാവിലെ പ്രാര്‍ഥനയ്ക്കു വന്നവരാണ് മണ്ണിട്ടുമൂടിയ നിലയില്‍ പന്നിയുടെ തല കണ്ടെത്തിയത്. ഇതേ തുടര്‍ന്ന് ഇരുവിഭാഗത്തില്‍പ്പെട്ടവര്‍ സംഘടിച്ചതോടെ വ്യാപകമായി സംഘര്‍ഷമുണ്ടായി. ചിലര്‍ വ്യാപാരസ്ഥാപനങ്ങള്‍ക്കു നേരെ ആക്രമണം നടത്തുകയും കടകള്‍ക്കും വാഹനങ്ങള്‍ക്കും തീ വയ്ക്കുകയും ചെയ്തു. അക്രമം പടര്‍ന്നതോടെ പൊലീസ് സ്ഥലത്തെത്തി ലാത്തിച്ചാര്‍ജ് നടത്തി അക്രമികളെ വിരട്ടിയോടിച്ചു.

ചിക്കമഗളൂര്‍ നഗരത്തിലെ ഹനുമന്തപ്പ സര്‍ക്കിളിലും ടോഗ്രിയങ്കിള്‍ സര്‍ക്കിളിലും ആസാദ് പാര്‍ക്കിലും പൊലീസ് ലാത്തിച്ചാര്‍ജ് നടത്തി. ഇതേത്തുടര്‍ന്ന് നഗരത്തിലാകെ അപ്രതീക്ഷിതമായി കടകള്‍ അടയ്ക്കുകയും വാഹനഗതാഗതം നിലയ്ക്കുകയും ചെയ്തു. അക്രമത്തില്‍ പ്രതിഷേധിച്ച് ചിക്കമഗളൂര്‍ നഗരത്തില്‍ ഹര്‍ത്താല്‍ ആചരിച്ചു. സ്കൂളുകള്‍ക്കും കോളജുകള്‍ക്കും അവധി നല്‍കി. 

അക്രമസംഭവങ്ങള്‍ പടരാതിരിക്കാന്‍ കൂടുതല്‍ സായുധ പൊലീസിനെ നഗരത്തിലാകെ വിന്യസിച്ചു. ജില്ലാ ഭരണകൂടം ചിക്കമഗളൂര്‍ നഗരപരിധിയില്‍ നിരോധനാജ്ഞ പുറപ്പെടുവിച്ചു. അക്രമികളെ കണ്ടാല്‍ വെടിവയ്ക്കാന്‍ ഉത്തരവ് നല്‍കിയിട്ടുണ്ടെന്ന് ഉന്നത പൊലീസ് ഉദ്യോഗസ്ഥര്‍ അറിയിച്ചു. സ്ഥിതി നിയന്ത്രവിധേയമാണെന്നും പൊലീസ് വ്യക്തമാക്കി.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News