ക്ലിഫ് ഹൗസ് സമരത്തിനിടെ നേതാക്കള്‍ക്ക് വീട്ടമ്മയുടെ ശകാരവര്‍ഷം; സരിതയുടെ ആളാണോയെന്ന് നേതാക്കള്‍

തിരുവനന്തപുരം: മുഖ്യമന്ത്രി ഉമ്മന്‍ചാണ്ടിക്കെതിരെ എല്‍ഡിഎഫ് നടത്തിയ ക്ലിഫ് ഹൗസ് ഉപരോധത്തിനിടെ വീട്ടമ്മയുടെ ശകാരവര്‍ഷം. ഉപരോധത്തിനിടെ യാത്ര തടസ്സപ്പെട്ടതിനാണ് സ്‌കൂട്ടറില്‍ സഞ്ചരിക്കുകയായിരുന്ന യുവതി ഉപരോധസമരക്കാര്‍ക്കെതിരെ തിരിഞ്ഞത്.

ദേവസ്വംബോര്‍ഡ് ജംഗ്ഷനിലാണ് രാവിലെ ഉപരോധസമരം നടന്നത്. ഇവിടെ ബാരിക്കേഡ് സ്ഥാപിച്ച് പോലീസും അണിനിരന്നതിനാല്‍ ക്ലിഫ്ഹൗസിന് പിറകിലേക്കുള്ള റോഡിലേക്ക് പോകാനെത്തിയ വീട്ടമ്മയ്ക്ക് അങ്ങോട്ട് പോകാനായില്ല. ഇതാണ് വീട്ടമ്മയെ ചൊടിപ്പിച്ചത്.

10 വയസ്സുള്ള പെണ്‍കുട്ടികളെ കൊണ്ടുപോയി പീഡിപ്പിക്കുന്നു. അതിനെതിരെയൊന്നും സമരം നടത്താനാരും ഇല്ലേ എന്ന് ചോദിച്ചു. അതോടെ ഇത് സരിതയുടെ ആരെങ്കിലുമാണോ എന്ന് എല്‍.ഡി.എഫ് നേതാക്കളില്‍ ആരോ പരാമര്‍ശം നടത്തി. അതോടെ സ്ത്രീയുടെ രോഷം കൂടി.

വീട്ടമ്മയുടെ ശകാരമേറ്റ നേതാക്കള്‍ പോലീസിനോട് ബാരിക്കേഡ് മാറ്റാന്‍ ആവശ്യപ്പെട്ടു. ഇടതു മുന്നണി സമരം നടത്തുന്നത് ജനങ്ങളെ ബുദ്ധിമുട്ടിക്കാനാണെന്ന് വരുത്തിതീര്‍ക്കാനാണ് പോലീസിന്റെ ശ്രമമെന്ന് നേതാക്കള്‍ ആരോപിച്ചു. സ്ഥലത്ത് പോലീസും നേതാക്കളും ദീര്‍ഘനേരം വാക്കേറ്റത്തില്‍ ഏര്‍പ്പെട്ടു. തുടര്‍ച്ചയായ നാലാം ദിവസമാണ് ഇടതു മുന്നണി ക്ലിഫ് ഹൗസ് ഉപരോധ സമരത്തിനെത്തുന്നത്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News, House Wife