ജനമനസ്സുകളില്‍ ഇടം നേടി സിദ്ദിഖ്

കാസര്‍കോട്: പാര്‍ലിമെന്റ് മണ്ഡലം തിരിച്ചുപിടിക്കാമെന്ന വിജയപ്രതീക്ഷയോടെ അഡ്വ: ടി.സിദ്ദിഖ് സാധാരണക്കാരിലേക്ക് ഇറങ്ങിച്ചെന്ന് പ്രവര്‍ത്തിക്കുന്നത് ഏറെ ആവേശമാകുന്നു. വെളളിയാഴ്ച പുലര്‍ച്ചെ കാഞ്ഞങ്ങാടു മുതല്‍ അമ്പലത്തറ വരെ സ്വകാര്യ ബസ്സിലെ യാത്രക്കാരോടൊപ്പം യാത്രചെയ്ത് വോട്ടഭ്യര്‍ത്ഥിച്ചപ്പോള്‍ നാട്ടുകാര്‍ക്ക് ഏറെ കൗതുകമായി.

ചാനലുകളില്‍ ചൂടുപിടിച്ച രാഷ്ട്രീയ ചര്‍ച്ചകളിലും സംവാദത്തിലും പങ്കെടുത്ത് തിളങ്ങി നില്‍ക്കാറുള്ള സിദ്ദിഖ് സാധാരണക്കാരന്റെ വാഹനമായ ബസ്സില്‍ തങ്ങളുടെ സമീപത്തിരിക്കുകയും കുശലാന്വേഷണം നടത്തി യാത്ര ചെയ്യുന്നതു കണ്ട ജനങ്ങള്‍ക്ക് ഏറെ ആവേശവും അത്ഭുതവുമുണ്ടായി. സ്ഥാനാര്‍ത്ഥിയെ ഒരുനോക്കു കാണാനും, സംസാരിക്കാനും തിക്കും തിരക്കും കൂട്ടി. 

തുടര്‍ന്ന് ജില്ലയുടെ കിഴക്കന്‍ മലയോര ഗ്രാമമായ ബളാലിലെ വോട്ടര്‍മാരെ നേരില്‍ കാണുകയായിരുന്നു. രാവിലെ പത്തുമണിക്ക് ബളാലിലെത്തിയ സ്ഥാനാര്‍ത്ഥിക്കൊപ്പം നൂറുകണക്കിനാളുകള്‍ എത്തിയത് തനിക്ക് ഏറെ ആത്മവിശ്വാസം പകരുന്നതാണെന്ന് അദ്ദേഹം മാധ്യമപ്രവര്‍ത്തകരോട് പറഞ്ഞു. 

രാജപുരം സെന്റ് പയസ് ടെന്‍ത് കോളേജിലെ വിദ്യാര്‍ത്ഥികളുടെ ഊഷ്മള സ്വീകരണത്തിന് ശേഷം, പുല്ലൂരിലെ പ്രസിദ്ധമായ മാക്കരംകോട് തറവാട്ടില്‍ രഞ്ജിത്ത് സംവിധാനം ചെയ്യുന്ന ഞാന്‍ എന്ന സിനിമയുടെ ഷൂട്ടിംഗ് സ്ഥലത്തെത്തി വോട്ടഭ്യര്‍ത്ഥിച്ചു. ഷൂട്ടിംഗ് കാണാനെത്തിയ നൂറുകണക്കിനാളുകള്‍ നിറമനസ്സോടെ തന്നെ സ്വീകരിച്ചതിലുള്ള സന്തോഷം അദ്ദേഹം അറിയിച്ചു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News,