മുറിച്ചു മാറ്റുന്നതിനിടെ തെങ്ങുവീണ് രണ്ട് പേര്‍ മരിച്ചു

നാദാപുരം: കിണര്‍ കുഴിക്കാനായി മുറിച്ചു മാറ്റുന്നതിനിടെ തെങ്ങുവീണ് അയല്‍വാസികളായ രണ്ട് പേര്‍ മരിച്ചു. നാദാപുരത്തിനടുത്ത് ഉമ്മത്തുര്‍ എസ്.ഐ. ഹയര്‍സെക്കന്‍ഡറി സ്‌കൂളിനടുത്ത് ഇല്ലത്ത് കുമാരന്‍(48) കോത്തരേമ്മല്‍ ഇല്ലത്ത് മുഹമ്മദ് റാഫി(46) എന്നിവരാണ് മരിച്ചത്. 

വെള്ളിയാഴ്ച രാവിലെ പത്തരയോടെയാണ് അപകടമുണ്ടായത്. ചോറയില്‍ സുലൈഖയുടെ പറമ്പില്‍ കിണര്‍ കുഴിക്കാന്‍ തെങ്ങ് മുറിച്ചു മാറ്റുന്നതിനിടയിലാണ് അപകടം. തെങ്ങു മുറിച്ചുകൊണ്ടിരുന്ന കുമാരനെ സഹായിക്കാനെത്തിയതായിരുന്നു അയല്‍വാസിയായ റാഫി .

മുറിച്ചുമാറ്റുന്നതിനിടെ തെങ്ങ് മറ്റൊരു തെങ്ങില്‍ വീണ് സമീപത്തേക്ക് ചിതറിത്തെറിക്കുകയായിരുന്നു. ഇതിനിടെ രണ്ട് പേരും തെങ്ങിനടിയില്‍പെട്ടു. ഇരുവര്‍ക്കും തലയ്ക്കും നെഞ്ചിനും കാലിനുമാണ് പരിക്ക്.

റാഫിയെ തലശ്ശേരിയിലും കുമാരനെ വടകര ആസ്​പത്രിയിലും എത്തിച്ചെങ്കിലും ജീവന്‍ രക്ഷിക്കാനായില്ല. കുമാരന്‍ കൂലിപ്പണിക്കാരനും റാഫി കടവത്തുര്‍ ടൗണിലെ ഫാര്‍മസിസ്റ്റുമാണ്.

ഹൈറുന്നിസയാണ് റാഫിയുടെ ഭാര്യ. പരേതനായ ഷൈക്ക് മുഹമ്മദിന്റെയും ബാഹുവിന്റെയും മകനാണ്. മക്കള്‍ : റിസ്വാന, റിയാന, റിഫാസ്. സഹോദരങ്ങള്‍ : അഷ്‌റഫ്, ശാഫി, നാസര്‍, ഇസ്മായില്‍, ഷമീം, ഹസീന

സുമതിയാണ് കുമാരന്റെ ഭാര്യ. മന്ദിയുടെയും പരേതനായ ചാത്തുവിന്റെയും മകനാണ്. മക്കള്‍ : രജിഷ, ധന്യ, നന്ദന, ശാരോണ്‍. സഹോദരങ്ങള്‍ : കമല, ശാന്ത.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News, Kerala.