അച്ഛന്‍ മകളെ വെടിവെച്ചു കൊല്ലാന്‍ ശ്രമിച്ചത് മകളെ ഭാര്യ തട്ടിയെടുക്കുമെന്ന ഭയം

തിരുവനന്തപുരം: അച്ഛന്റെ തോക്കിനിരയായി മെഡിക്കല്‍ കോളജ് ആശുപത്രിയില്‍ ഗുരുതരാവസ്ഥയില്‍ കഴിയുന്ന യുവതിയുടെ നില മെച്ചപ്പെടുന്നു. യുവതിയുടെ ശരീരത്തിലെ വെടിയുണ്ട നാലു മണിക്കൂര്‍നീണ്ട ശസ്ത്രക്രിയയിലൂടെ നീക്കംചെയ്തു. ശനിയാഴ്ച രാത്രി ഒന്നരയോടെ ആരംഭിച്ച ശസ്ത്രക്രിയ ഞായറാഴ്ച പുലര്‍ച്ചെ രണ്ടു മണിയോടെയാണ് പൂര്‍ത്തിയായത്. സങ്കീര്‍ണമായ ശസ്ത്രക്രിയ സര്‍ജിക്കല്‍ ഗ്യാസ്‌ട്രോ വിഭാഗം മേധാവി ഡോ. രമേശ് രാജന്‍, സര്‍ജറി വിഭാഗം അസോ. പ്രൊഫ. ഡോ. ജോബി ജോണ്‍ എന്നിവരുടെ നേതൃത്വത്തിലാണ് നടന്നത്.

മെഡിക്കല്‍ കോളേജ് ട്യൂട്ടറായ യുവതിയുടെ ശരീരത്തിന്റെ വലതു ഭാഗത്ത് അടിവയറിനോടു ചേര്‍ന്നാണ് ഉണ്ട തറച്ചത്. ഇതും കുറച്ച് ഇരുമ്പിന്റെ അവശിഷ്ടങ്ങളുമാണു നീക്കിയത്. പരിശോധനയില്‍ മറ്റ് അവയവങ്ങള്‍ക്കൊന്നും ക്ഷതം സംഭവിച്ചതായി കണ്ടെത്തിയിട്ടില്ല. അതിനിടെ പിതാവ് റോയി ചെറിയാന്‍ തൃശൂരിലുണ്ടെന്ന് സൂചന ലഭിച്ചതായി അന്വേഷണം സംഘം അറിയിച്ചു.

ഞായറാഴ്ച പകല്‍ തൃശൂരിലെ എസ്.ബി.ഐ എടിഎം കൗണ്ടറില്‍ നിന്ന് ഇയാള്‍ 10000 രൂപ പിന്‍വലിച്ചതായി അന്വേഷണ സംഘം കണ്ടെത്തിയിട്ടുണ്ട്. എടിഎം കൗണ്ടറിലെ കാമറയില്‍ ഇയാളുടെ ചിത്രം പതിഞ്ഞിട്ടുണ്ടെന്നാണ് അന്വേഷണ സംഘം നല്‍കുന്ന സൂചന. മകളെ നിറയൊഴിക്കാന്‍ റോയി ഉപയോഗിച്ച വിദേശ നിര്‍മ്മിത എയര്‍ ഗണ്‍ കണ്ടെടുത്തു.

മീയണ്ണൂര്‍ പാലമുക്കിന് സമീപത്തെ വാടക വീട്ടില്‍ പൂട്ടിയിരുന്ന അലമാര പൊളിച്ചപ്പോഴാണ് തോക്ക് കണ്ടെടുത്തത്. ഇത് കാനഡയില്‍ നിന്ന് കൊണ്ടു വന്നതാകാമെന്നാണ് കരുതുന്നത്. പാസ്‌പോര്‍ട്ട് അടക്കമുളള മറ്റ് രേഖകളും ഈ അലമാരയിലുണ്ടായിരുന്നു. അതുകൊണ്ട് തന്നെ വിദേശത്തേക്ക് ഇയാള്‍ കടക്കാനുളള സാദ്ധ്യത ഇല്ലാതായതായും പോലീസ് പറയുന്നു. അതിനിടെ ഗുരുതരാവസ്ഥ മറികടന്നെങ്കിലും യുവതി രണ്ടു ദിവസം കൂടി തീവ്രപരിചരണ വിഭാഗത്തില്‍ തുടരും.

എയര്‍ ഗണ്‍ ഉപയോഗിച്ചാണ് വെടിവച്ചതിനാലാണ് യുവതിയുടെ നില കൂടുതല്‍ വഷളാകാതിരുന്നത്. ശനിയാഴ്ച രാവിലെയാണു കൊല്ലം മീയണ്ണൂര്‍ പാലമുക്കിനു സമീപം വാടകയ്ക്കു താമസിക്കുന്ന റോയി ചെറിയാന്‍ മകള്‍ റോണി (25)യെ വെടിവച്ചത്. മീയണ്ണൂരെ സ്വകാര്യ മെഡിക്കല്‍ കോളജില്‍ അധ്യാപികയായി ജോലി കിട്ടിയ റോണിയുടെ സൗകര്യാര്‍ഥമാണ് ഈ കുടുംബം ആറു മാസം മുന്‍പ് ഇവിടെ താമസിക്കാനെത്തിയത്.

റോണിയുടെ മാതാവ് ഭര്‍ത്താവുമായി വേര്‍പിരിഞ്ഞ് 23 വര്‍ഷമായി എറണാകുളത്തു തനിച്ചു കഴിയുകയാണ്. മാതാവിനൊപ്പം താമസിക്കാന്‍ റോണി പോയതാണു പിതാവിനെ പ്രകോപിപ്പിച്ചത് എന്നാണു പോലീസ് കരുതുന്നത്. മകളെ നഷ്ടപ്പെടുമെന്ന ഭീതിയാണ് ഇയാളെ കടുംകൈ ചെയ്യാന്‍ പ്രേരിപ്പിച്ചതെന്നു കരുതുന്നു. വെടിയേറ്റ റോണി വീടിനു പുറത്തേക്കോടി അയല്‍വീട്ടില്‍ അഭയം തേടുകയായിരുന്നു.

അയല്‍വാസിയുടെ നേതൃത്വത്തിലാണ് മീയണ്ണൂരിലെ സ്വകാര്യ മെഡിക്കല്‍ കോളജ് ആശുപത്രിയിലെത്തിച്ചത്. കരളില്‍ വെടിയുണ്ട തറച്ചതായി പരിശോധനയില്‍ കണ്ടെ ത്തിയതിനേത്തുടര്‍ന്ന് റോണിയെ വിദഗ്ദ്ധചികിത്സയ്ക്കായി തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിക്കുകയായിരുന്നു. റോണിക്ക് ഒരുവയസുള്ളപ്പോള്‍ റോയി ചെറിയാന്‍ ഭാര്യ ആന്‍സിയുമായി പിണങ്ങിപ്പിരിയുകയും വിവാഹബന്ധം വേര്‍പെടുത്തുകയും ചെയ്തു. കോടതി വിധിപ്രകാരം റോണി പിതാവിനൊപ്പമാണു വളര്‍ന്നത്.

കഴിഞ്ഞ ദിവസം മുമ്പ് റോണി പിതാവറിയാതെ അമ്മയെ കാണാന്‍ എറണാകുളം പള്ളുരുത്തിയില്‍ പോയിരുന്നു. വീട്ടിലെത്താതിരുന്നതിനേത്തുടര്‍ന്നു മകളെ കാണാനില്ലെന്ന് റോയി ചാത്തന്നൂര്‍ പോലീസ് സ്റ്റേഷനില്‍ പരാതിയും നല്‍കിയിരുന്നു. തുടര്‍ന്ന് പോലീസ് അമ്മയേയും മകളെയും വിളിച്ചുവരുത്തി കരുനാഗപ്പള്ളി കോടതിയില്‍ ഹാജരാക്കി. ഒരുദിവസം അമ്മയ്‌ക്കൊപ്പം കഴിയാന്‍ കോടതി അനുമതി നല്‍കുകയും ചെയ്തു. ഇതിനു ശേഷം മടങ്ങിയെത്തിയപ്പോഴാണ് ആക്രമണമുണ്ടായത്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Father, Daughter, Murder Attempt.

	GREENWOODS
	PUBLIC SCHOOL & JUNIOR COLLEGE
	A.K. Road, P.O. Bekal, Kasaragod
ADMISSION OPEN FOR LOWER KINDERGARTEN -LKG
(Age Eligibility : 3½ years as on 01-06-2014)
& Limited seats are vacant in classes UKG TO IX (ICSE CURRICULUM)
For more details, contact Admission Counsellor Ph : 9895688729, 0467 3255688, 2265566, 2239566 Email:greenwoodsschool@gmail.com website: www.bekalgreenwoodsschool.com