കടുത്ത പ്രമേഹത്തിന് പുറമെ രക്തസമ്മര്‍ദ്ദവും കഠിനമായി ആരോഗ്യനില വഷളായ അബ്ദുല്ല ഇപ്പോള്‍ ദേര്‍ലക്കട്ട യേനപ്പോയ മെഡിക്കല്‍ കോളേജില്‍ കഴിയുകയാണ്.
വലിയൊരു സുഹൃദ് വലയമുള്ള അബ്ദുല്ല മൊഗ്രാലിന്‍റെ കലാ-സാംസ്കാരിക-രാഷ്ട്രീയ രംഗങ്ങളിലെല്ലാം സജീവമായിരുന്നു. മാപ്പിളപ്പാട്ടിനോടുള്ള കൂറും സ്നേഹവും വെളിപ്പെടുത്താന്‍ അബ്ദുല്ല പല തവണ കാസര്‍കോട്ട് തനിമ എന്ന പേരില്‍ പരിപാടികള്‍ അവതരിപ്പിച്ചിട്ടുണ്ട്. അദ്ദേഹത്തെ തനിമ അബ്ദുല്ല എന്നാണ് വിളിച്ചിരുന്നത്.
മാപ്പിളപ്പാട്ട് മത്സരങ്ങളും സെമിനാറുകളും സംഘടിപ്പിക്കുന്നതിലും ഏറെ ഉത്സാഹം കാട്ടാറുള്ള എം.കെ അബ്ദുല്ല പല പരിപാടികളും ഒരുക്കിയത് തന്‍റെ ഒറ്റക്കുള്ള കഠിനാധ്വാനം കൊണ്ടാണ്. കാസര്‍കോട് മുനിസിപ്പല്‍ ടൌണ്‍ ഹാളില്‍ ഒരിക്കല്‍ വിപുലമായി നടത്തിയ തനിമ ഇശല്‍ സന്ധ്യക്കൊടുവില്‍ ക്ഷീണിതനായി അബ്ദുല്ല വേദിയില്‍ വീണതും ദിവസങ്ങളോളം ആസ്പത്രിയില്‍ കിടക്കേണ്ടി വന്നതും അധികമാരും മറന്നിട്ടില്ല.
രാഷ്ട്രീയരംഗത്തും അബ്ദുല്ലയുടെ സജീവസാന്നിധ്യമുണ്ടായിരുന്നു. നിലവിലദ്ദേഹം ജനതാദള്‍ ജില്ലാ പ്രസിഡണ്ടാണ്. മൊഗ്രാലിന്‍റെ ഇശല്‍പെരുമയെ അടയാളപ്പെടുത്തിയ ഇശല്‍ ഗ്രാമം വിളിക്കുന്നു എന്ന ഡോക്യുമെന്‍ററി ഒരു നാടിന്‍റെ എവിടെയോ മറന്നുപോയ നല്ല നാളുകളെ മാലോകര്‍ക്കു മുന്പില്‍ അവതരിപ്പിക്കുന്നതായിരുന്നു. കൈരളി ചാനല്‍ സംപ്രേഷണം ചെയ്ത ഈ ഡോക്യുമെന്‍ററി ഏറെ പ്രശംസ പിടിച്ചുപറ്റുകയും അബ്ദുല്ലക്കിത് വലിയ അംഗീകാരം നേടിക്കൊടുക്കുകയും ചെയ്തിരുന്നു.
ഇശല്‍ രാവുകളൊരുക്കി മാപ്പിളപ്പാട്ടിന്‍റെ മാധുര്യം നാട്ടുകാര്‍ക്ക് സമ്മാനിക്കുന്നതിനിടയില്‍ അബ്ദുല്ല പക്ഷെ തന്‍റെ സ്വകാര്യ ജീവിതം മറന്നുപോയിരുന്നു. വിവിധ രംഗങ്ങളില്‍ മികവ് പുലര്‍ത്തുന്നവരെ കണ്ടെത്തി ആദരിക്കുന്നതിലും അദ്ദേഹം സന്തോഷം കണ്ടെത്തിയിരുന്നു.
ബംഗളൂരുവില്‍ വിപുലമായൊരു ആദരവ് പരിപാടി സംഘടിപ്പിച്ച് നാട്ടിലെത്തിയ ഉടനെയായിരുന്നു കടുത്ത രക്തസമ്മര്‍ദ്ദവും പ്രമേഹവും അദ്ദേഹത്തെ വീഴ്ത്തിക്കളഞ്ഞത്. ദിവസങ്ങളോളം നീളുന്ന ചികിത്സാ ചെലവിനും വീട്ടിലെ ദയനീയാവസ്ഥക്കും മുന്നില്‍ പകച്ചുനില്‍ക്കുകയാണ് നാട്ടുകാരും കൂട്ടുകാരും.
Keywords: Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News
No comments:
Post a Comment