ബൈക്ക് യാത്രക്കാരന്‍റെ കണ്ണില്‍ മുളക് പൊടി വിതറി അഞ്ച് ലക്ഷം രൂപ തട്ടിയ കേസില്‍ 17 കാരനടക്കം രണ്ടുപേര്‍ അറസ്റ്റില്‍

കാസര്‍കോട്: ബൈക്ക് യാത്രക്കാരനെ തടഞ്ഞുനിര്‍ത്തി കണ്ണില്‍ മുളക് പൊടി വിതറി അഞ്ച് ലക്ഷം രൂപ തട്ടിയെടുത്ത കേസില്‍ 17കാരനടക്കം രണ്ടുപേരെ പൊലീസ് അറസ്റ്റ് ചെയ്തു. ബദര്‍നഗര്‍ സ്വദേശിയായ 17 കാരനേയും ചൌക്കി കുന്നിലിലെ മഷൂഖി (24) നെയുമാണ് അറസ്റ്റ് ചെയ്തത്. 

മഷൂഖ് കേസിലെ ആറാം പ്രതിയാണ്. ഒന്നാം പ്രതി ഉപ്പളയിലെ ഫാറൂഖ് ഒളിവിലാണ്. മറ്റു മൂന്നുപ്രതികളായ ഭീമനടിയിലെ സമീര്‍, നാലാം മൈലിലെ ഹക്കീം, ചെര്‍ളടുക്കയിലെ സിറാജുദ്ദീന്‍ എന്നിവരെ നേരത്തെ അറസ്റ്റ് ചെയ്തിരുന്നു.
അറസ്റ്റിലായ 17 കാരനെ സി.ജെ.എം കോടതി ജുവനൈല്‍ ഹോമിലേക്ക് മാറ്റി. മഷൂഖിനെ ശനിയാഴ്ച കോടതിയില്‍ ഹാജരാക്കും.

ജൂണ്‍ ഏഴിനാണ് സംഭവം നടന്നത്. ചട്ടഞ്ചാല്‍ തെക്കില്‍ മാര ഹൌസിലെ സി.എച്ച് അബ്ദുല്‍ ജലീലിന്‍റെ പണമാണ് തട്ടിയെടുത്തത്. ബൈക്കില്‍ പോവുകയായിരുന്ന ജലീലിനെ നാനോകാറിലെത്തിയ സംഘം ബേവിഞ്ച സ്റ്റാര്‍ നഗറിലെ ഇടവഴിയില്‍ വെച്ചാണ് അക്രമിച്ചത്. 

കാസര്‍കോട് സി.ഐ ടി.പി ജേക്കബ്, എസ്.ഐ ഫിലിപ്പ് തോമസ്, സ്ക്വാഡ് അംഗങ്ങളായ സി.കെ ബാലകൃഷ്ണന്‍, കെ. ലക്ഷ്മി നാരായണന്‍ എന്നിവരുടെ നേതൃത്വത്തിലാണ് പ്രതികളെ പിടിച്ചത്.

Keywords: Kasaragod News, National News, Gulf News, Health News, Educational News, MalabarFlash, Malabar Vartha, Malabar News, Malayalam News