റിലയന്‍സിന്റെ ഈ 'പരീക്ഷണം' അല്പം കൂടുന്നുവെന്ന് മറ്റ് കമ്പനികള്‍ പരാതി പറയുന്നിടം വരെയെത്തി കാര്യങ്ങള്‍. ഇപ്പോഴിതാ 'ജിയോഫൈ 2 മൈഫൈ' ( JioFi 2 MiFi ) എന്ന പേരില്‍ പോര്‍ട്ടബിള്‍ വൈഫൈ ഹോട്ട്‌സ്‌പോട്ടും റിലയന്‍സ് പരീക്ഷണാടിസ്ഥാനത്തില്‍ വിപണിയിലെത്തിച്ചിരിക്കുന്നു. റിലയന്‍സ് ഡിജിറ്റല്‍ സ്റ്റോറുകളില്‍ നിന്ന് 2,899 രൂപ നല്‍കി 'ജിയോഫൈ 2' വാങ്ങാനാകും.
പരന്നൊരു ചെറുകല്ലിനോട് കാഴ്ചയില്‍ സാമ്യമുള്ള ചെറുഗാഡ്ജറ്റാണ് ജിയോഫൈ 2. സൗജന്യ ജിയോ സിം കാര്‍ഡ്, 90 ദിവസത്തേക്ക് സൗജന്യ പരിധിയില്ലാ 4ജി ഇന്റര്‍നെറ്റ് സൗകര്യം, എച്ച്ഡി വോയ്‌സ് കോളിങ്, ജിയോ ആപ്പുകളിലേക്കുള്ള സൗജന്യ പ്രവേശനം എന്നിവയാണ് ജിയോഫൈ 2നൊപ്പം ലഭിക്കുന്ന ഓഫറുകള്‍.
ജീന്‍സിന്റെ പോക്കറ്റില്‍ കൊള്ളാവുന്നയത്രയും ചെറുതാണ് ജിയോഫൈ 2. പൂര്‍ണമായും പ്ലാസ്റ്റിക് കൊണ്ട് നിര്‍മിച്ചിരിക്കുന്ന ജിയോഫൈ 2ന്റെ പുറകില്‍ ഊരിയെടുക്കാവുന്ന വിധത്തിലുളള ബാക്ക് കവറുണ്ട്. ഉള്ളില്‍ സിം സ്ലോട്ട്, 32 ജിബി വരെയുള്ള മൈക്രോ എസ്ഡി കാര്‍ഡ് സ്ലോട്ട്, 2,300 എംഎഎച്ച് ബാറ്ററി, ചാര്‍ജ് ചെയ്യാനുള്ള മൈക്രോ യുഎസ്ബി പോര്‍ട്ട് എന്നിവയാണുള്ളത്.
മുന്‍വശത്ത് നാല് എല്‍ഇഡി ഇന്‍ഡിക്കേറ്ററുകള്‍-നെറ്റ്‌വര്‍ക്ക് കണക്ടിവിറ്റി, മൊബൈല്‍ ഡാറ്റ, വൈഫൈ കണക്ടിവിറ്റി, ഡബ്ല്യു.പി.എസ്. (വൈഫൈ പ്രൊട്ടക്റ്റഡ് സെറ്റ് അപ്പ്) എന്നിവയുടെ പ്രവര്‍ത്തനം സൂചിപ്പിച്ച്-തെളിഞ്ഞുകത്തും. ഗാഡ്ജറ്റിന്റെ ചാര്‍ജ് കാണിക്കുന്നതിനായി മൂന്ന് എല്‍ഇഡി ഇന്‍ഡിക്കേറ്ററുകള്‍ വേറെയുമുണ്ട്.
മുന്‍ഭാഗത്തും ഇടതുവശത്തുമായി രണ്ട് ബട്ടനുകള്‍ മാത്രമേ ജിയോഫൈ 2ലുളളൂ. മുമ്പിലുള്ള ബട്ടന്‍ വൈഫൈ ഹോട്ട്‌സ്‌പോട്ടിന്റെ പവര്‍ ബട്ടനായും ഇടതുവശത്തുള്ള ബട്ടന്‍ ഡബ്ല്യു.പി.എസിന്റെ പവര്‍ ബട്ടനായും പ്രവര്‍ത്തിക്കുന്നു. പവര്‍ ബട്ടന്റെ മുകളിലുള്ള എല്‍ഇഡിയല്ലാതെ മറ്റൊരു എല്‍ഇഡിയും പ്രവര്‍ത്തനവേളയില്‍ കത്തില്ല.
കൊച്ചുകുട്ടികള്‍ക്ക് പോലും ഉപയോഗിക്കാനാവുന്ന തരത്തില്‍ എളുപ്പമുള്ളതാണ് ജിയോഫൈ 2ന്റെ പ്രവര്‍ത്തനരീതി. സിം കാര്‍ഡ് ഇട്ട ശേഷം മുന്നിലെ പവര്‍ ബട്ടന്‍ ഓണാക്കിയാല്‍ 5-10 സെക്കന്‍ഡിനുള്ളില്‍ അത് ജിയോ 4ജി നെറ്റ്‌വര്‍ക്കുമായി കണക്ട് ആകും. തുടര്‍ന്ന് ഏതാനും സെക്കന്‍ഡുകള്‍ക്കുള്ളില്‍ വൈഫൈ ഇന്‍ഡിക്കേറ്റര്‍ ഓണാകും. മറ്റ് ഡിവൈസുകളുമായി വൈഫൈ സേവനം പങ്കുവെക്കാന്‍ ഗാഡ്ജറ്റ് തയ്യാറായി എന്നതിന്റെ സൂചനയാണിത്. അതിന് ശേഷം പാസ്‌വേഡ് നല്‍കി സ്മാര്‍ട്‌ഫോണോ ടാബ്ലറ്റോ ലാപ്‌ടോപ്പോ വൈഫൈ നെറ്റ്‌വര്‍ക്കുമായി ബന്ധിപ്പിക്കാം.
ഗൂഗിള്‍ പ്ലേ സ്‌റ്റോറില്‍ നിന്ന് ഡൗണ്‍ലോഡ് ചെയ്‌തെടുക്കാവുന്ന 'ജിയോജോയിന്‍' ആപ്പിന്റെ സഹായത്തോടെ സൗജന്യ വോയ്‌സ് കോളിങും നടക്കും. ജിയോഫൈ 2വുമായി കണക്റ്റ് ചെയ്യുന്ന ഏത് സ്മാര്‍ട്‌ഫോണ്‍ വഴിയും ഇങ്ങനെ കോള്‍ ചെയ്യാം. ഫോണിനുള്ളില്‍ സിംകാര്‍ഡ് പോലും വേണമെന്നില്ല.
ഇതിന് പുറമെ ജിയോമാഗ്‌സ്, ജിയോപ്ലേ,ജിയോബീറ്റ്‌സ് തുടങ്ങി ഒട്ടേറെ ആപ്പുകള്‍ ഫോണില്‍ പ്രവര്‍ത്തിപ്പിക്കാനാകും. ലൈവ് ടിവി സേവനവും ഇതോടൊപ്പം ലഭിക്കും. 20 എംബിപിഎസ് വേഗമുള്ളതിനാല്‍ ഡൗണ്‍ലോഡിങും വീഡിയോ ബഫറിങുമൊക്കെ ഞൊടിയിടയില്‍ നടക്കും.
പരീക്ഷണഘട്ടം ആയതുകൊണ്ടാണോ എന്നറിയില്ല ജിയോഫൈ 2ല്‍ അതിവേഗത്തിലുള്ള ഇന്റര്‍നെറ്റ് ആക്‌സസും മറ്റ് സേവനങ്ങളും ലഭ്യമാണിപ്പോള്‍. 90 ദിവസത്തെ സൗജന്യ ഡാറ്റ സൗകര്യം എന്നത് പ്രലോഭിപ്പിക്കുന്ന വാഗ്ദാനവുമാണ്.
ഇനിയറിയേണ്ടത് ജിയോ നെറ്റ്‌വര്‍ക്ക് പൂര്‍ണമായും തുറക്കപ്പെടുമ്പോള്‍ ഇതേ വേഗവും സേവനങ്ങളും ഉറപ്പുതരാന്‍ റിലയന്‍സിനാകുമോ എന്നതാണ്. അങ്ങനെ സംഭവിച്ചാല്‍ രാജ്യത്തെ മൊബൈല്‍ ഇന്റര്‍നെറ്റ് രംഗത്ത് വിപ്ലവമാറ്റങ്ങള്‍ കൊണ്ടു വരാന്‍ ജിയോഫൈ 2നാകും.
(കടപ്പാട്: മാതൃഭൂമി)
Keywords: Tech News, Kerala Vartha, Malabarflash, Malabar news, Malayalam News
No comments:
Post a Comment