നീലേശ്വരത്ത് കശുവണ്ടി പറിക്കവെ യുവതി ഇടിമിന്നലേറ്റ് മരിച്ചു

നീലേശ്വരം : പറമ്പില്‍ കശുവണ്ടി പറിക്കവെ യുവതി ഇടിമിന്നലേറ്റ് മരിച്ചു. കിനാന്നൂര്‍ കരിന്തളം കൊണ്ടോടിയിലെ വി. ബിന്ദു (27) ആണ് മരിച്ചത്. ഏറെ നേരമായിട്ടും തിരിച്ചെത്താത്തതിനെ തുടര്‍ന്ന് ബന്ധുക്കള്‍ നടത്തിയ അന്വേഷണത്തിലാണ് മരിച്ചനിലയില്‍ കണ്ടത്. സമീപത്തെ തേക്ക് മരത്തിന്റെ കൊമ്പുകള്‍ ഇടിമിന്നലേറ്റ് ചിതറിയ നിലയിലായിരുന്നു. ബിന്ദുവിന് എട്ട് വര്‍ഷം മുമ്പ് പാചകത്തിനിടെ ഗുരുതരമായി പൊള്ളലേറ്റിരുന്നു. വരയില്‍ സൗപര്‍ണ്ണിക കുടുംബശ്രീ യൂണിറ്റ് പ്രസിഡന്‌റാണ്. പരേതനായ വരയില്‍ അമ്പാടി - കാരിച്ചി ദമ്പതികളുടെ മകളാണ്. സഹോദരങ്ങള്‍- മധു, ശാന്ത. വിവരം അറിഞ്ഞ് നീലേശ്വരം പോലീസ് സ്ഥലത്തെത്തി. മൃതദേഹം പോസ്റ്റുമോര്‍ട്ടത്തിനായി കാഞ്ഞങ്ങാട് ജില്ലാ ആശുപത്രി മോര്‍ച്ചറിയിലേക്ക് മാറ്റി.