14 കാരിയെ പീഡിപ്പിക്കാന്‍ ശ്രമിച്ച 4 യുവാക്കള്‍ അറസ്റ്റില്‍

മംഗലാപുരം: പുഴക്കരയില്‍ നിന്ന് വീട്ടിലേക്ക് പോവുകയായിരുന്ന 14 കാരിയെ ഭീഷണിപ്പെടുത്തി കൂട്ടിക്കൊണ്ടു പോയി ബലാത്സംഗം ചെയ്യാന്‍ ശ്രമിച്ച നാലു യുവാക്കളെ ബെല്‍ത്തങ്ങാടി പോലീസ് അറസ്റ്റു ചെയ്തു. മാര്‍ച് ഒമ്പതിന് ബെല്‍ത്തങ്ങാടിയില്‍ നേതാവ്രതി പുഴയോരത്താണ് കേസിനാസ്പദമായ സംഭവമുണ്ടായത്. എട്ടാം തരത്തില്‍ പഠിക്കുന്ന 14 വയസുള്ള പെണ്‍കുട്ടിയെയാണ് പീഡിപ്പിക്കാന്‍ ശ്രമിച്ചത്. സംഭവത്തില്‍ മിത്തബാഗിലുവിലെ ഫയാസ് (19), നാസര്‍ (18), നൗഷാദ് (19), ഷാക്കിര്‍ (19) എന്നിവരാണ് ചൊവ്വാഴ്ച അറസ്റ്റിലായത്.
പുഴക്കരയില്‍ നിന്ന് പെണ്‍കുട്ടിയുടെ നിലവിളി കേട്ട് പശുവിനെ മേയ്ക്കുകയായിരുന്ന ഒരു സ്ത്രീ ഓടിവന്നപ്പോള്‍ യുവാക്കള്‍ പെണ്‍കുട്ടിയെ ഉപേക്ഷിച്ച് ഓടി രക്ഷപ്പെടുകയായിരുന്നു. സംഭവം പുറത്തറിയിച്ചാല്‍ കൊന്നു കളയുമെന്ന് സംഘം പെണ്‍കുട്ടിയെ ഭീഷണിപ്പെടുത്തുകയും ചെയ്തിരുന്നു.
വീട്ടിലെത്തിയ പെണ്‍കുട്ടി പരിഭ്രാന്തി പ്രകടിപ്പിക്കുന്നത് കണ്ട് മാതാപിതാക്കള്‍ ചോദിച്ചപ്പോഴാണ് പീഡന ശ്രമത്തെകുറിച്ച് പെണ്‍കുട്ടി പറഞ്ഞത്. തുടര്‍ന്ന് പിതാവ് ബെല്‍ത്തങ്ങാടി പോലീസില്‍ പരാതിപ്പെടുകയും എസ്.ഐ യോഗീഷിന്റെ നേതൃത്വത്തില്‍ പ്രതികളെ അറസ്റ്റ് ചെയ്യുകയുമായിരുന്നു.