ഉപ്പളയില്‍ യുവാവ് വെട്ടേററു

ഉപ്പള : കോഴിക്കോട് വടക്കാഞ്ചേരി സ്വദേശിയെ വെട്ടേറ്റ് മംഗലാപുരം ആശുപത്രിയില്‍ പ്രവേശിപ്പിച്ചു. കോഴിക്കോട് വടക്കാഞ്ചേരിയിലെ ഷുഹൈലി (30)നെയാണ് ഗുരുതരമായി പരിക്കേറ്റ് മംഗലാപുരം ആശുപത്രിയില്‍ പ്രവേശിപ്പിച്ചത്. ഞായറാഴ്ച രാത്രി പതിനൊന്നുമണിയോടെ ഉപ്പള മണ്ണംകുഴിയിലെ ഗസ്റ്റ് ഹൗസിനു സമീപത്ത് വെച്ചാണ് സംഭവം. കാറിലും ബൈക്കിലുമെത്തിയ സംഘമാണത്രെ വെട്ടിപ്പരിക്കേല്‍പ്പിച്ചത്. നിലവിളി കേട്ട് ഓടിയെത്തിയ നാട്ടുകാര്‍ ഉടന്‍ ഉപ്പള സ്വകാര്യാശുപത്രിയില്‍ പ്രവേശിപ്പിച്ചെങ്കിലും നില ഗുരുതരമായതിനാല്‍ മംഗലാപുരത്തേക്ക് മാറ്റുകയായിരുന്നു. കാസര്‍കോടിന്റെ വിവിധ ഭാഗങ്ങളില്‍ ഇലക്ട്രോണിക് സാധനങ്ങള്‍ വില്‍പ്പന നടത്തുന്ന ഷുഹൈല്‍ മണ്ണംകുഴിയിലെ ഗസ്റ്റ് ഹൗസിലാണ് റൂമെടുത്ത് താമസിക്കുന്നത്. കച്ചവടം കഴിഞ്ഞ് ഞായറാഴ്ച രാത്രിയോടെ താമസ സ്ഥലത്തേക്ക് പോകുമ്പോള്‍ ഗെയ്റ്റിനു സമീപം വെച്ച് ബൈക്കിലും കാറിലും എത്തിയ സംഘം അക്രമിക്കുകയായിരുന്നു. മഞ്ചേശ്വരം പോലീസ് കേസെടുത്ത് അന്വേഷണമാരംഭിച്ചു.