സാമ്പത്തിക പ്രശ്‌നം: തടവിലാക്കിയ രണ്ട് പേരെ ഷാര്‍ജ പോലിസ് മോചിപ്പിച്ചു

ഷാര്‍ജ: സാമ്പത്തിക പ്രശ്‌നത്തെ തുടര്‍ന്ന് തടവിലാക്കിയിരുന്ന രണ്ട് ബംഗ്ലാദേശി യുവാക്കളെ ഷാര്‍ജ പോലിസ് മോചിപ്പിച്ചു. ഏഴ് പാക്കിസ്ഥാനികളായിരുന്നു ഇവരെ തട്ടിക്കൊണ്ട് പോയി ഒളിവില്‍ പാര്‍പ്പിച്ചിരുന്നത്. കത്തി കാണിച്ച് ഭീഷണിപ്പെടുത്തി പണം ഏര്‍പ്പാടാക്കാനായിരുന്നു സംഘം ആവശ്യപ്പെട്ടിരുന്നത്. കൂട്ടുകാരെ കാണാത്തതിനെ തുടര്‍ന്ന് ബംഗ്ലാദേശി യുവാക്കളുടെ സുഹൃത്തുക്കളാണ് ഷാര്‍ജ പോലിസില്‍ പരാതി നല്‍കിയിരുന്നത്. തട്ടിക്കൊണ്ട് പോയ വിവരം മനസ്സിലാക്കിയ ഷാര്‍ജ പോലിസ് പ്രത്യേക അന്വേഷണ സംഘത്തെ തന്നെ നിയമിക്കുകയായിരുന്നു. ഷാര്‍ജയിലെ രണ്ട് ഫ്‌ളാറ്റുകളില്‍ നിന്നാണ് പ്രതികളെ പിടികൂടിയത്. സാമ്പത്തി ഇടപാടിനെ തുടര്‍ന്നാണ് രണ്ട് പേരെയും തട്ടിക്കൊണ്ട് പോയതെന്ന് പ്രതികള്‍ ഷാര്‍ജ പോലിസിനോട് സമ്മതിച്ചു. ജോലിയും, പണവും ഇല്ലാത്ത അനധികൃത തൊഴിലാളുമായി യാതൊരു നിലക്കും ബന്ധം സ്ഥാപിക്കരുതെന്ന് ഷാര്‍ജ പോലിസ് അഭ്യര്‍ത്ഥിച്ചു.