ബേക്കലില്‍ ജ്വല്ലറി ഉടമയുടെ കണ്ണില്‍ മുളക്‌പൊടി വിതറി കൊളളയടിക്കാന്‍ ശ്രമം

ബേക്കല്‍ : ബൈക്കില്‍ തോക്കുമായി എത്തിയ രണ്ടംഗസംഘം ജ്വല്ലറി ഉടമയുടെ കണ്ണില്‍ മുളകുപൊടി വിതറി ബാഗ് തട്ടിപ്പറിച്ച് രക്ഷപ്പെട്ടു. വെളളിയാഴ്ച രാത്രി ബേക്കല്‍ മീത്തലെ മൗവ്വലിലാണ് സംഭവം. സ്ഥലത്തു നിന്നും കൊള്ള സംഘത്തിന്റെ തോക്ക് പോലീസ് കസ്റ്റഡിയില്‍ എടുത്തു. കുണിയയിലെ നികേഷ് ജ്വല്ലറി വര്‍ക്‌സ് ഉടമ നാരായണനെയാണ് ബൈക്കിലെത്തിയ രണ്ടംഗ സംഘം കൊള്ളയടിക്കാന്‍ ശ്രമിച്ചത്. രാത്രി കടപൂട്ടി ബൈക്കില്‍ വീട്ടിലേക്ക് പുറപ്പെട്ടതായിരുന്നു നാരായണന്‍. കരുവാക്കോട്ടെത്തിയപ്പോള്‍ പിന്തുടര്‍ന്നെത്തിയ മോട്ടോര്‍ സൈക്കിലുള്ളവര്‍ മുഖത്ത് കുരുമുളക് പൊടി വിതറി. കൈയ്യിലുണ്ടായിരുന്ന നൈലോണ്‍ സഞ്ചിയില്‍ സൂക്ഷിച്ച മൂന്നു പൊതികളില്‍ ഒന്നെടുത്ത് സംഘം രക്ഷപ്പെടുകയായിരുന്നു. എന്നാല്‍ 25 പവനും, 50,000 രൂപയുമടങ്ങിയ സഞ്ചി നഷ്ടപ്പെട്ടില്ല. നാരായണന്റെ ബഹളം കേട്ട് സമീപവാസികള്‍ സ്ഥലത്ത് ഓടിയെത്തുമ്പോഴേക്കും സംഘം രക്ഷപ്പെട്ടിരുന്നു. രക്ഷപ്പെടുന്നതിനിടയില്‍ കൈയ്യിലുണ്ടായിരുന്ന തോക്ക് താഴെ വീഴുകയായിരുന്നു. നാട്ടുകാര്‍ പിടികൂടുമെന്ന ഭയത്തിലാണ് തോക്കെടുക്കാതെ സംഘം രക്ഷപ്പെട്ടത്. വിവരമറിഞ്ഞെത്തിയ ബേക്കല്‍ പോലീസ് തോക്ക് കസ്റ്റഡിയില്‍ എടുത്തു. അക്രമികളെ കണ്ടെത്താന്‍ വ്യാപകമായ തിരച്ചില്‍ ആരംഭിച്ചിട്ടുണ്ട്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Mapappuram News