എസ്.ഡി.പി.ഐ പ്രഥമ അംബേദ്കര്‍ അവാര്‍ഡ് ഷബ്‌ന സിയാദിന്

കൊച്ചി: ഡോ. ബി ആര്‍ അംബേദ്കറുടെ പേരില്‍ എസ്.ഡി.പി.ഐ സംസ്ഥാന കമ്മിറ്റി ഏര്‍പ്പെടുത്തിയ പ്രഥമ മാധ്യമ അവാര്‍ഡിന് തേജസ് കൊച്ചി ബ്യൂറോയിലെ സീനിയര്‍ റിപോര്‍ട്ടര്‍ ഷബ്‌നാ സിയാദ് അര്‍ഹയായി. ആദിവാസിസ്ത്രീകള്‍ ആചാരം മറികടക്കാന്‍ ഗര്‍ഭനിരോധന ഗുളികകള്‍ ഉപയോഗിക്കുന്നതിലെ അപകടം തുറന്നുകാണിക്കുന്ന പരമ്പരയാണ് അവാര്‍ഡിന് അര്‍ഹയാക്കിയത്. മുതുവാന്‍ വിഭാഗത്തിലെ സ്ത്രീകള്‍ ആര്‍ത്തവകാലത്ത് സ്വന്തം കുടിലുകളില്‍നിന്നു മാറി ഒറ്റയ്ക്കു താമസിക്കണമെന്നാണ് ആചാരം. ഇതു മറികടക്കാന്‍ ആര്‍ത്തവം നിര്‍ത്തുന്നതിനു ഗുളിക ഉപയോഗിക്കുന്നതിലെ അപകടമാണു പരമ്പര തുറന്നുകാണിച്ചത്.
ചന്ദ്രിക പത്രാധിപര്‍ ടി പി ചെറുപ്പ, തേജസ് പത്രാധിപര്‍ എന്‍ പി ചെക്കുട്ടി, മംഗളം എക്‌സിക്യൂട്ടീവ് എഡിറ്റര്‍ എ സജീവന്‍, പാഠഭേദം പത്രാധിപര്‍ ടോമി മാത്യു എന്നിവരടങ്ങിയ ജൂറി കമ്മിറ്റിയാണ് ജേതാവിനെ കണെ്ടത്തിയത്. 10,000 രൂപയും ഫലകവുമാണ് അവാര്‍ഡ്. പ്രശസ്ത മാധ്യമപ്രവര്‍ത്തകന്‍ എം ജി രാധാകൃഷ്ണന്‍ അവാര്‍ഡ് സമ്മാനിക്കും.
മൂവാറ്റുപുഴ കാലംപൂര്‍ കെ എം മൂസ-ഫാത്തിമ ദമ്പതികളുടെ മകളാണ് ഷബ്‌ന. ആലുവ ചാലക്കല്‍ ടി എ സിയാദാണ് ഭര്‍ത്താവ്. മക്കള്‍: താരിഖ്ബ്‌നു സിയാദ്, തൗഫീഖ്ബ്‌നു സിയാദ്. 2006 മുതല്‍ തേജസില്‍ ജോലി ചെയ്തുവരുന്നു. വാര്‍ത്താസമ്മേളനത്തില്‍ എസ്.ഡി.പി.ഐ സംസ്ഥാന ജനറല്‍ സെക്രട്ടറി എം കെ മനോജ്കുമാര്‍, എറണാകുളം ജില്ലാ പ്രസിഡന്റ് ഷഫീര്‍ മുഹമ്മദ് സംബന്ധിച്ചു. 

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News