വെസ്റ്റ് എളേരിയില്‍ മുസ്‌ലിംലീഗ് യുഡിഎഫ് വിട്ടു

കാഞ്ഞങ്ങാട്: വെസ്റ്റ് എളേരി പഞ്ചായത്തില്‍ മുസ്‌ലിംലീഗ് യുഡിഎഫ് മുന്നണി വിടാനും പഞ്ചായത്ത് ഭരണസമിതിക്കുള്ള പിന്തുണ പിന്‍വലിക്കാനും തീരുമാനിച്ചു.

18 വാര്‍ഡുകളുള്ള പഞ്ചായത്തില്‍ ലീഗിന്റെ രണ്ടംഗങ്ങള്‍ ഉള്‍പ്പെടെ യുഡിഎഫിനു 10ഉം എല്‍ഡിഎഫിന് എട്ടും അംഗങ്ങളാണുണ്ടായിരുന്നത്. കഴിഞ്ഞദിവസം ചേര്‍ന്ന മുസ്‌ലിംലീഗിന്റെ പഞ്ചായത്ത് കമ്മിറ്റി യോഗത്തിലാണു തീരുമാനമുണ്ടായത്.

കഴിഞ്ഞ രണ്ടുവര്‍ഷത്തോളം കാലമായി പ്രദേശത്തു കോണ്‍ഗ്രസും മുസ്‌ലിം ലീഗും രൂക്ഷമായ അഭിപ്രായവ്യത്യാസം നിലനിന്നിരുന്നു.

ഒരാഴ്ച കുന്നുംകൈ വാഴള്ളിയിലുണ്ടായ സംഘര്‍ഷമാണു കടുത്ത നടപടിയെടുക്കാന്‍ ലീഗിനെ പ്രേരിപ്പിച്ചത്. സമുദായത്തിലെ ഒരു വിഭാഗം ആള്‍ക്കാര്‍ തമ്മിലുള്ള പ്രശ്‌നം കോണ്‍ഗ്രസ്-ലീഗ് പ്രശ്‌നമായി ചിത്രീകരിച്ചെന്നും ലീഗ് നേതാക്കള്‍ക്കെതിരെ കള്ളക്കേസെടുത്തു നിരന്തരം പീഡിപ്പിച്ചെന്നും ലീഗ് ആരോപിക്കുന്നു.

കോണ്‍ഗ്രസിനെതിരെ ലീഗ് നേതൃത്വം ഇവിടെ പത്രസമ്മേളനം നടത്തിയിരുന്നു. ഇതേത്തുടര്‍ന്നു യുഡിഎഫ് ജില്ലാ നേതൃത്വം ഇടപെട്ട് ഒരു തവണ തൃക്കരിപ്പൂര്‍ ലീഗ് ഓഫീസില്‍ ഒത്തുതീര്‍പ്പു ചര്‍ച്ച നടത്തിയെങ്കിലും ഫലം കണ്ടില്ല.

മുന്നണി വിടാന്‍ തീരുമാനിച്ച യോഗത്തില്‍ പഞ്ചായത്ത് കമ്മിറ്റിയംഗം ടി.പി.അബ്ദുള്‍ കരീം അധ്യക്ഷത വഹിച്ചു. പഞ്ചായത്തംഗം കെ.സി.മുഹമ്മദുകുഞ്ഞി, ജാതിയില്‍ അസൈനാര്‍, എം.പി.അബ്ദുള്‍ റഹ്മാന്‍ മാസ്റ്റര്‍, പി.കെ.അബ്ദുള്‍കരീം ഹാജി, കെ.അഹമ്മദുകുഞ്ഞി, പി.സി.ഇസ്മായില്‍, എ.ദുല്‍ഫിക്കലി, എം.ടി.പി.മുഹമ്മദ് എന്നിവര്‍ സംസാരിച്ചു.

ഭരണത്തെ ബാധിക്കില്ല: കോണ്‍ഗ്രസ്
ഭീമനടി: മുസ്ലിംലീഗ് പിന്തുണ പിന്‍വലിച്ചാലും പഞ്ചായത്ത് ഭരണത്തിനു യാതൊരു പ്രതിസന്ധിയുമുണ്ടാവില്ലെന്നു വെസ്റ്റ് എളേരി മണ്ഡലം കോണ്‍ഗ്രസ് പ്രസിഡന്റ് പി.കെ. അബൂബക്കര്‍ അറിയിച്ചു.
പത്തംഗങ്ങളുളള യുഡിഎഫില്‍ കേരളാ കോണ്‍ഗ്രസ്-എം ഒന്ന്, ലീഗ് ഒന്ന്, യുഡിഎഫ് സ്വതന്ത്ര ഒന്ന്, കോണ്‍ഗ്രസ് ഏഴ് എന്നിങ്ങനെയാണ് കക്ഷിനില. എന്നാല്‍ ലീഗ് പിന്തുണ പിന്‍വലിച്ചെങ്കിലും യുഡിഎഫ് സ്വതന്ത്രയുടെ പിന്തുണയോടെ പഞ്ചായത്ത് ഭരണം നിലനിര്‍ത്തുമെന്ന് അദ്ദേഹം അറിയിച്ചു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News