ലക്ഷദ്വീപില്‍ ബോട്ട് മുങ്ങി അഞ്ചുപേര്‍ മരിച്ചു

കവരത്തി: ലക്ഷദ്വീപില്‍ മത്സ്യബന്ധനബോട്ട് മുങ്ങി സഹോദരിമാരായ രണ്ടുകുട്ടികളും ഒരു സ്ത്രീയും ഉള്‍പ്പടെ അഞ്ചുപേര്‍ മരിച്ചു. 22 പേരെ നാട്ടുകാര്‍ രക്ഷപ്പെടുത്തി. കടമത്ത് ദ്വീപിന് സമീപമാണ് അപകടമുണ്ടായത്. യന്ത്രത്തകരാറാണ് അപകടകാരണം.

അമിനി ദ്വീപ് സ്വദേശികളായ നങ്ങാട്ടിയത്ത് മുഹമ്മദ് കോയ (52), ഭാര്യ കുന്നിപ്പുരയില്‍ സൈനബി (50), ചെറിയപാണ്ടിയാലയില്‍ മൂസ (45), കടമത്ത് ദ്വീപ് സ്വദേശികളും സഹോദരിമാരുമായ ബല്‍ക്കീസ് മന്‍സിലില്‍ റൗസിയ (7), അലീസിയ (5) എന്നിവരുമാണ് മരിച്ചത്. മുഹമ്മദ് കോയ പൊതുമരാമത്ത് വകുപ്പില്‍ ഡ്രൈവറാണ്.

അമിനിയില്‍ നിന്ന് കടമത്തിലേക്ക് പോയ അല്‍ അമീന്‍ എന്ന മത്സ്യബന്ധനബോട്ടാണ് അപകടത്തില്‍പെട്ടത്. ഈ ദ്വീപുകള്‍ക്കിടയില്‍ യാത്രാസൗകര്യം ഇല്ലാത്തത് കൊണ്ട് സാധാരണ മത്സ്യബന്ധനബോട്ടുകളിലാണ് യാത്രാക്കാരെ കൊണ്ടുപോകുന്നത്.

അപകടസമയത്ത് 27 പേര്‍ ബോട്ടിലുണ്ടായിരുന്നു. കടമത്തിലെത്തിയ ബോട്ട് അമിനിയിലേക്ക് തിരിക്കവെയാണ് ബോട്ടുജെട്ടിക്കരികില്‍ മുങ്ങിയത്. പരിക്കേറ്റവരെ കടമത്തിലെ പ്രാഥമിക ആരോഗ്യകേന്ദ്രത്തില്‍ പ്രവേശിപ്പിച്ചു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News