മകളുടെ കളിചിരി കാണാന്‍ കൊതിച്ച് സുഹലത്തും കുടുംബവും

തൃക്കരിപ്പൂര്‍: മകളുടെ കളിചിരി കാണാന്‍ കൊതിച്ച് മാതാപിതാക്കള്‍. ജനനം മുതല്‍ മൂത്രസംബന്ധമായ അസുഖത്തെ തുടര്‍ന്ന് ചികിത്സയില്‍ കഴിയുന്ന രണ്ടു വയസ്സുകാരി ശാമിലയെ നിരവധി ഡോക്ടര്‍മാരെ കാണിച്ച് ചികിത്സിച്ചുവെങ്കിലും അസൂഖം ഭേദമായില്ല. മെട്ടമ്മല്‍ സ്വദേശിനി എ പി ടി സുഹലത്തിന്റെ ഏക മകളാണ് ശാമില. 

ആറ് വര്‍ഷമായി മാച്ചിക്കാട് വാടകവീട്ടില്‍ താമസിക്കുന്ന ഈ നിര്‍ധന കുടുംബം മകളുടെ തുടര്‍ ചികിത്സയ്ക്ക് പണം കണ്ടെത്താന്‍ കഴിയാതെ ദുരിതം അനുഭവിക്കുകയാണ്. മൂത്രനാളിയിലെ തടസ്സംമൂലം പുറത്തേക്ക് പോകാതെ കെട്ടിനിന്ന് പനിയുള്‍പ്പടെയുള്ള അസുഖം പിടിപെടുന്ന അപൂര്‍വരോഗമാണ് കുട്ടിയില്‍ കണ്ടുതുടങ്ങിയത്. 

പയ്യന്നൂര്‍ സഹകരണ ആശുപത്രി, മംഗളുരു ഇന്ത്യാന ആശുപത്രി, കോഴിക്കോട് മിംസ് ആശുപത്രി എന്നിവിടങ്ങളില്‍ വിദഗ്ധ ചികിത്സ നല്‍കിയെങ്കിലും അസുഖത്തിന് മാറ്റമില്ല. നാട്ടുകാരില്‍ നിന്നും കടം വാങ്ങിയും ഡോക്ടര്‍മാരുടെ കനിവുകൊണ്ടും മാത്രമാണ് ചികിത്സ നടത്തിയത്. ഭാരിച്ച ചെലവ് വരുന്ന ശസ്ത്രക്രിയ നടത്തിയാല്‍ രോഗം സുഖപ്പെടുത്താനാകുമെന്നാണ് ഡോക്ടര്‍മാര്‍ പറയുന്നത്. ഭര്‍ത്താവ് ഉപേക്ഷിച്ച സുഹലത്തിന് മകളുടെ ചികിത്സ താങ്ങാനാവുന്നതല്ല. 

മത്സ്യത്തൊഴിലാളിയായ കുടുംബനാഥന്‍ അബൂബക്കറിന്റെ തുച്ഛമായ വരുമാനംകൊണ്ടാണ് ഈ കുടുംബം നിത്യച്ചെലവിനുള്ള വഴി കണ്ടെത്തുന്നത്. കുട്ടിയുടെ ചികിത്സയ്ക്ക് നാട്ടുകാരില്‍നിന്നും മൂന്നുലക്ഷം രുപ കടം വാങ്ങി. ഇതു വീട്ടാനാകാത്തത് കുടുംബത്തിനെ അലട്ടുന്നു. ഇപ്പോള്‍ വിദഗ്ധ ചികിത്സയ്ക്ക് എറണാകുളം അമൃത ഹോസ്പിറ്റലിലേക്ക് പോയിരിക്കുകയാണ്. സുമനസ്സുള്ളവര്‍ ഈ കുരുന്നിന്റെ കണ്ണീരൊപ്പാന്‍ സഹായിക്കുമെന്ന പ്രതീക്ഷയിലാണ് ഈ നിര്‍ധന കുടുംബം.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News