റസിഡന്റ്‌സ് അസോസിയേഷനുകളുടെ ഉല്‍ഘാടനം എന്‍.എ. നെല്ലിക്കുന്ന് എം.എല്‍.എ നിര്‍വ്വഹിക്കും

കാസര്‍കോട്: സാഹോദര്യത്തിനും പരസ്പര സ്‌നേഹത്തിനും അതിരുകള്‍ ഉണ്ടാകുവാന്‍ പാടില്ല എന്ന മുദ്രാവാക്യവുമായി ഒരു നല്ല സമൂഹത്തിന്റെ വീണ്ടെടുപ്പിനായി റസിഡന്റ്‌സ് അസോസിയേഷന്‍ എന്ന കുട കീഴില്‍ എല്ലാവരും അണിനിരക്കുകയാണ്. ജനമൈത്രി പോലീസ് വകുപ്പിന്റെ മേല്‍ നോട്ടത്തില്‍ അവരുമായി സഹകരിച്ചു കൊണ്ടാണ് അസോസിയേഷനുകള്‍ രൂപീകൃതമാവുന്നത്.

തളങ്കര തെരുവത്ത് 3 മേഖലകളിലായുള്ള റെസിഡന്റ്‌സ് അസോസിയേഷനുകളുടെ ഉല്‍ഘാടനം കാസര്‍കോട് എം.എല്‍.എ എന്‍.എ നെല്ലിക്കുന്ന് നിര്‍വഹിക്കും. 22-09-2013 ഞായറാഴ്ച്ച ഉച്ചക്ക് 2.30ന് തെരുവത്ത് ശ്രീ ചീരുമ്പാ ഭഗവതി ക്ഷേത്ര ഓഡിറ്റോറിയത്തില്‍ നടക്കുന്ന ചടങ്ങില്‍ അഡ്വക്കേറ്റ് കെ. നാരായണ തെരുവത്ത് അദ്ധ്യക്ഷത വഹിക്കും.

റെസിഡന്റ്‌സ് അസോസിയേഷന്‍ പരിധിക്കുള്ളില്‍ എസ്.എസ്.എല്‍.സി, പ്‌ളസ്ടു ഉന്നത വിജയം നേടിയ വിദ്യാര്‍ത്ഥികള്‍ക്കുള്ള ഉപഹാരം കാസര്‍കോട് ജില്ലാ പോലീസ് ചീഫ് തോംസണ്‍ ജോസ് സമ്മാനിക്കും. അതോടൊപ്പം സംസ്ഥാന തലത്തില്‍ മികച്ച രണ്ടാമത്തെ പി.ടി.എയായി തെരഞ്ഞെടുക്കപ്പെട്ട ഗവ. മുസ്ലിം ഹയര്‍ സെക്കണ്ടറി പി.ടി.എ പ്രസിഡന്റ് കെ.എ.മുഹമ്മദ് ബഷീറിനെ ആദരിക്കും.

നഗരസഭാ കൗണ്‍സിലര്‍മാരായ കുമാരി നൈമുന്നിസ, കുഞ്ഞിമൊയ്തീന്‍, കാസര്‍കോട് ഡി വൈ. എസ്.പി മോഹന ചന്ദ്രന്‍ നായര്‍, സര്‍ക്കിള്‍ ഇന്‍സ്‌പെക്ടര്‍ സുനില്‍ കുമാര്‍, ഫ്രാക്ക് പ്രസിഡന്റ് ഇ.ചന്ദ്രശേഖരന്‍ നായര്‍, സെക്രട്ടറി എം.കെ. രാധാകൃഷ്ണന്‍ എന്നിവര്‍ സംബന്ധിക്കും. നഗരസഭാ കൗണ്‍സിലര്‍ സുലൈമാന്‍ ഹാജി ബാങ്കോട് സ്വാഗതവും കെ.എ. മുഹമ്മദ് ബഷീര്‍ നന്ദിയും പറയും.

ഇതു സംബന്ധിച്ച യോഗത്തില്‍ അഡ്വ. നാരായണ തെരുവത്ത് അദ്ധ്യക്ഷത വഹിച്ചു. നഗരസഭാ കൗണ്‍സിലര്‍മാരായ സുലൈമാന്‍ ഹാജി ബാങ്കോട്, നൈമുന്നിസ, കെ.എ. മുഹമ്മദ് ബഷീര്‍, എന്‍.എ.സുലൈമാന്‍, യൂനുസ് തളങ്കര, അബ്ദുല്‍ നാസര്‍, ഗണേഷ് കോളാര്‍, ഷാഫി എ.നെല്ലിക്കുന്ന് എന്നിവര്‍ സംസാരിച്ചു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News