അഭ്യൂഹങ്ങള്‍ അവസാനിപ്പിച്ച് ഒടുവില്‍ മഞ്ജു വാര്യര്‍ വീണ്ടും സിനിമയിലേക്ക്

കൊച്ചി: അഭ്യൂഹങ്ങള്‍ അവസാനിപ്പിച്ച് ഒടുവില്‍ മഞ്ജു വാര്യര്‍ വീണ്ടും സിനിമയിലേക്ക്. രഞ്ജിത് സംവിധാനം ചെയ്യുന്ന മോഹന്‍ലാല്‍ ചിത്രത്തിലൂടെയാണ് പതിനാലു വര്‍ഷത്തിനു ശേഷം മഞ്ജുവിന്റെ തിരിച്ചുവരവ്. ആശിര്‍വാദ് സിനിമാസിനു വേണ്ടി ആന്റണി പെരുമ്പാവൂരാണ് സിനിമ നിര്‍മിക്കുന്നത്. നവംബര്‍ അവസാന വാരമോ ഡിസംബറിലോ ഷൂട്ടിങ് തുടങ്ങും.

സത്യന്‍ അന്തിക്കാടിന്റെ ചിത്രത്തിലൂടെയാണ് മഞ്ജു വീണ്ടും സിനിമയിലെത്തുന്നതെന്നായിരുന്നു ആദ്യത്തെ വാര്‍ത്ത. പക്ഷേ അദ്ദേഹം തന്നെ പിന്നീട് ഇത് നിഷേധിച്ചു. പക്ഷേ അപ്പോഴൊന്നും മഞ്ജു തീരുമാനം പറഞ്ഞിരുന്നില്ല. ശനിയാഴ്ച ലാലും രഞ്ജിത്തുമായുള്ള സംഭാഷണത്തില്‍ നിന്നാണ് മഞ്ജുവിനെ നായികയാക്കിയുള്ള സിനിമയുടെ ആദ്യ ആലോചനയുണ്ടായത്. ''ഇത് പെട്ടെന്ന് സംഭവിച്ച ഒന്നാണ്. നേരത്തെ യാതൊരു പദ്ധതിയുമില്ലായിരുന്നു'' - രഞ്ജിത് പറഞ്ഞു. ഞായാറാഴ്ച മഞ്ജുവിനോട് സംസാരിച്ചപ്പോള്‍ സമ്മതം കിട്ടുകയും ചെയ്തു. ആന്റണി പെരുമ്പാവൂരും മഞ്ജുവുമായുള്ള കൂടിക്കാഴ്ചയില്‍ ചിത്രത്തില്‍ അഭിനയിക്കാനുള്ള അവസാന ധാരണയുമായി.

കൊല്‍ക്കത്ത പശ്ചാത്തലമാക്കിയുള്ള മോഹന്‍ലാല്‍ സിനിമയായിരുന്നു രഞ്ജിത്തിന്റെ അടുത്ത പ്രോജക്ട്. പക്ഷേ മഞ്ജു നായികയാകാന്‍ സമ്മതിച്ചതോടെ കഥയില്‍ മാറ്റം വരും. മോഹന്‍ലാലും മഞ്ജുവിനും തുല്യ പ്രാധാന്യമുള്ള കഥയുടെ ആദ്യ രൂപം രഞ്ജിത് പൂര്‍ത്തിയാക്കിക്കഴിഞ്ഞു. 

രഞ്ജിത് തിരക്കഥയെഴുതിയ 'ആറാം തമ്പുരാനി'ല്‍ മഞ്ജുവായിരുന്നു ലാലിന്റെ നായിക. ലോഹിതദാസിന്റെ 'കന്മദ'മാണ് ഇവര്‍ ഒരുമിച്ച മറ്റൊരു ചിത്രം. ദിലീപുമായുള്ള വിവാഹ ശേഷം സിനിമയില്‍ നിന്ന് പിന്മാറിയ മഞ്ജു ജൂലായിലാണ് അമിതാഭ് ബച്ചനൊപ്പമുള്ള കല്യാണ്‍ ജ്വല്ലേഴ്‌സ് പരസ്യചിത്രത്തിലൂടെ അഭിനയത്തിലേക്ക് മടങ്ങിയെത്തിയത്. 'പത്ര'മാണ് മഞ്ജു ഒടുവില്‍ അഭിനയിച്ച സിനിമ. മാതൃഭൂമി സ്റ്റാര്‍ ആന്‍ഡ് സ്‌റ്റൈലിന്റെ ആദ്യ ലക്കത്തിലെ അഭിമുഖത്തിലാണ് മഞ്ജു സിനിമയിലേക്ക് മടങ്ങിവരുന്നതിന്റെ ആദ്യ സൂചന നല്‍കിയത്. 

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News