സാബിത്ത് വധം: മുഖ്യപ്രതികള്‍ക്ക് ഒളിത്താവളം ഒരുക്കിയ കൊന്നക്കാട്ടെ ഇലക്ട്രീഷ്യന്‍ പിടിയില്‍

കാസര്‍കോട്: നഗരത്തിലെ വസ്ത്ര വ്യാപാര സ്ഥാപനത്തിലെ ജീവനക്കാരന്‍ ചൂരി മീപ്പുഗിരിയിലെ സാബിത്ത് എന്ന യുവാവിനെ ജെ പി കോളനിക്കടുത്ത് വെച്ച് കുത്തിക്കൊന്ന കേസിലെ ഒന്നും രണ്ടും പ്രതികളായ ജെ പി കോളനിയിലെ അക്ഷയ്, ചൂരിയിലെ വൈശാഖ് എന്നിവര്‍ക്ക് ഒളിത്താവളമൊരുക്കി കൊടുത്ത ഇലക്ട്രീഷ്യനും ബിഎംഎസ് പ്രവര്‍ത്തകനുമായ കൊന്നക്കാട് മൂത്താടിയിലെ ധനജ്ഞയകുമാറിനെ പോലീസ് കസ്റ്റഡിയിലെടുത്തു.

ജൂലായ് 7ന് ഉച്ചക്കാണ് സാബിത്ത് കൊല്ലപ്പെട്ടത്. സംഭവത്തിന് ശേഷം കേസിലെ ആറാംപ്രതി പവന്‍, മുഖ്യപ്രതികളായ അക്ഷയിനെയും വൈശാഖിനെയും വാഹനത്തില്‍ കൊന്നക്കാട്ട് ധനജ്ഞയകുമാറിന്റെ വീട്ടിലെത്തിക്കുകയായിരുന്നു. മൂന്നുനാല് ദിവസം ഇരുവരും ധനജ്ഞയകുമാറിന്റെ വീട്ടിലും പരിസരത്തുമായി ഒളിവില്‍ കഴിയുകയായിരുന്നു. പ്രതികള്‍ക്ക് ഒളിത്താവളമൊരുക്കിയതിന് ധനജ്ഞയകുമാറിനെ പോലീസ് കേസില്‍ കുടുക്കുകയും ചെയ്തു. 

ഇതേതുടര്‍ന്ന് ഒളിവില്‍ പോയ ധനജ്ഞയകുമാര്‍ ഹൈക്കോടതിയില്‍ മുന്‍കൂര്‍ ജാമ്യാപേക്ഷ സമര്‍പ്പിക്കുകയും കോടതി അത് നിരസിക്കുകയും കീഴ്‌ക്കോടതിയില്‍ ഹാജരാകാന്‍ നിര്‍ദ്ദേശിക്കുകയും ചെയ്തിരുന്നു. 

ഇതേതുടര്‍ന്ന് കാസര്‍കോട് കോടതിയില്‍ ഹാജരായ ധനജ്ഞയകുമാറിനെ കോടതി റിമാന്റ് ചെയ്യുകയും ചെയ്തു. കൂടുതല്‍ ചോദ്യം ചെയ്യുന്നതിനും തെളിവുകള്‍ ശേഖരിക്കുന്നതിനും ധനജ്ഞയകുമാറിനെ കോടതി കഴിഞ്ഞ ദിവസം രണ്ട് ദിവസത്തേക്ക് കസ്റ്റഡിയില്‍ വിട്ടുകൊടുത്തു. 

കാസര്‍കോട് എസ്‌ഐ ടി ഉത്തംദാസിന്റെ നേതൃത്വത്തിലുള്ള പോലീസ് സംഘം ധനജ്ഞയകുമാറിനെയും കൊണ്ട് കൊന്നക്കാട് മൂത്താടിയിലെ വീട്ടിലും പരിസരത്തും എത്തിച്ച് തെളിവുകള്‍ ശേഖരിച്ചു. കേസിലെ മുഖ്യപ്രതികളെ രക്ഷപ്പെടുത്താന്‍ ഉപയോഗിച്ച ബൈക്ക് അന്വേഷണ സംഘം കണ്ടെടുത്തു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News,