നാടിന് ആഘോഷമായി ഉത്തര മലബാര്‍ ജലോത്സവം

ചെറുവത്തൂര്‍: തേജസ്വിനി പുഴയുടെ കുഞ്ഞോളങ്ങളില്‍ തുഴയേന്തി കാണികളെ ആവേശത്തിമര്‍പ്പിലാക്കി അരങ്ങേറിയ ഉത്തരമലബാര്‍ ജലോത്സവത്തിന് സമാപ്തിയായി. 

വാശിയേറിയ 25 ആള്‍ തുഴയുന്ന മത്സരത്തില്‍ ഡി വൈ എഫ് ഐ കാര്യങ്കോട് എ ടീം ജേതാക്കളായി. 25,000 രൂപയുടെ പ്രൈസ്മണിക്ക് അര്‍ഹരായി. ഇ എം എസ് മുഴക്കീലിനാണ് രണ്ടാം സ്ഥാനം. ഇവര്‍ക്ക് 20,000 രൂപ സമ്മാനത്തുകയായി ലഭിച്ചു. രണ്ടാമത്തെ 15 ആള്‍ തുഴയുന്ന മത്സരത്തില്‍ കൃഷ്ണപിള്ള കാവുംചിറ ഒന്നാമതെത്തി. രണ്ടാം സ്ഥാനം നിര്‍ണയം സംബന്ധിച്ച് തീരുമാനമായില്ല. രണ്ടാം സ്ഥാനക്കാരെ പിന്നീട് തീരുമാനിക്കും. കാവുംചിറ ടീമിന് 15,000 രൂപ സമ്മാനത്തുകയായി ലഭിച്ചു.

നിശ്ചലദൃശ്യങ്ങളുടെ വിഭാഗത്തില്‍ ന്യൂ ജോളി കുണ്ടുപടന്നക്കാണ് ഒന്നാംസ്ഥാനം. ഇവര്‍ക്ക് 15,000 രൂപയും രണ്ടാംസ്ഥാനക്കാരായ യൂത്ത് നാഷണല്‍ തിയേറ്റേഴ്‌സ് അച്ചാംതുരുത്തിക്ക് 13,000രൂപയും ലഭിച്ചു.

പി കരുണാകരന്‍ എം പി ജലോത്സവം ഉദ്ഘാടനം ചെയ്തു. കെ കുഞ്ഞിരാമന്‍ എം എല്‍ എ അധ്യക്ഷത വഹിച്ചു. കരകൗശല വികസന കോര്‍പറേഷന്‍ ചെയര്‍മാന്‍ എം സി ഖമറുദ്ദീന്‍, നീലേശ്വരം നഗരസഭാ ചെയര്‍പേഴ്‌സണ്‍ വി ഗൗരി, സോഷ്യലിസ്റ്റ് ജനതാ ജില്ലാ സെക്രട്ടറി എ വി രാമകൃഷ്ണന്‍, ഇ കെ കെ പടന്നക്കാട് തുടങ്ങിയവര്‍ പ്രസംഗിച്ചു.

ജില്ലാ പോലീസ് ചീഫ് തോംസണ്‍ ജോസ് ഫ്‌ളാഗ് ഓഫ് ചെയ്തു. വൈകിട്ട് നടന്ന സമാപന സമ്മേളനം ഇ ചന്ദ്രശേഖരന്‍ എം എല്‍ എ ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്റ് പി പി ശ്യാമളാദേവി അധ്യക്ഷത വഹിച്ചു. ജില്ലാ കലക്ടര്‍ മുഹമ്മദ് സഗീര്‍ സമ്മാനദാനം നിര്‍വഹിച്ചു. പി ബി അബ്ദുറസാഖ് എം എല്‍ എ, സി വി കണ്ണന്‍, ബങ്കളം കുഞ്ഞികൃഷ്ണന്‍, അഡ്വ. കെ കെ രാജേന്ദ്രന്‍ തുടങ്ങിയവര്‍ പ്രസംഗിച്ചു. എം പി പത്മനാഭന്‍ നന്ദി പറഞ്ഞു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News