പുതിയ വഖ്ഫ് നിയമം പ്രാബല്യത്തില്‍

കോഴിക്കോട്: പുതിയ വഖ്ഫ് നിയമം പ്രാബല്യത്തില്‍വന്നു. കേന്ദ്ര വഖ്ഫ് ബോര്‍ഡാണ് കഴിഞ്ഞമാസം നിയമത്തില്‍ പരിഷ്‌കാരം വരുത്തിയത്. നിയമം പ്രാബല്യത്തില്‍വന്നതോടെ വഖ്ഫ് മുതല്‍ ഒത്തുമാറ്റം, വില്‍പ്പന, പണയപ്പെടുത്തല്‍ എന്നിവയെല്ലാം നിയമവിരുദ്ധമായി പ്രഖ്യാപിച്ചു. നേരത്തേ ബോര്‍ഡ് അനുമതിയോടെ വഖ്ഫ് വസ്തു വില്‍പ്പന നടത്താമായിരുന്നു. ഇപ്പോള്‍ വഖ്ഫ് സ്വത്ത് വില്‍പ്പന നടത്തുന്നതിനുള്ള അപേക്ഷ സ്വീകരിക്കല്‍ വഖ്ഫ് ബോര്‍ഡ് റീജ്യനല്‍ ഓഫിസുകളില്‍ നിര്‍ത്തലാക്കി. ആരെങ്കിലും വഖ്ഫ് ഭൂമി വില്‍ക്കുകയോ വാങ്ങുകയോ ചെയ്തതായി പരാതിപ്പെട്ടാല്‍ അന്വേഷണം നടത്തി തെളിവിന്റെ അടിസ്ഥാനത്തില്‍ കടുത്ത ശിക്ഷയും നല്‍കും. രണ്ടുവര്‍ഷം കഠിനതടവാണ് ശിക്ഷ. കൂടാതെ ഭൂമി തിരിച്ചുപിടിക്കുകയും ചെയ്യും.

ബോര്‍ഡില്‍ കള്ളക്കണക്ക് കൊടുക്കുന്ന വഖ്ഫ് സ്ഥാപനമേധാവികള്‍ക്ക് ആറുമാസം കഠിനതടവാണ് ശിക്ഷ. ജാമ്യമില്ലാത്ത വകുപ്പാണിത്.

ജില്ലാ ജഡ്ജി, എ.ഡി.എം., മുസ്‌ലിം ശരീഅത്ത് നിയമത്തില്‍ പരിജ്ഞാനമുള്ള ഒരു പണ്ഡിതന്‍ എന്നീ മൂന്നംഗ വഖ്ഫ് ട്രൈബ്യൂണല്‍ ബോര്‍ഡ് സ്ഥാപിക്കാനും നിയമം അനുശാസിക്കുന്നുണ്ട്. വഖ്ഫ് ഭൂമികള്‍ സര്‍വേ നടത്തി കൃത്യമായി അളന്നു കണക്കുകള്‍ സൂക്ഷിക്കാന്‍ അതത് സംസ്ഥാന സര്‍ക്കാരുകള്‍ക്ക് അധികാരം നല്‍കിയിട്ടുണ്ട്. കേരള സ്റ്റേറ്റ് വഖ്ഫ് ബോര്‍ഡില്‍ രണ്ടു മുസ്‌ലിം വനിതകളെ കൂടി അംഗങ്ങളാക്കാനും നിയമം അനുശാസിക്കുന്നു. വഖ്ഫ് സ്വത്തിന്റെ വാടകകരാറിന് ബോര്‍ഡിന്റെ അനുമതി വേണം. വാടകകരാറിന്റെ കാലാവധി കഴിഞ്ഞുള്ള ഇടപാടുകള്‍ കൈയേറ്റമായി കണക്കാക്കി ബോര്‍ഡിന് ഒഴിപ്പിക്കാം. പുതിയ നിയമം പ്രാബല്യത്തില്‍വന്നത് ഗുണകരവും ചിലയിടങ്ങളില്‍ പ്രയാസത്തിനു കാരണവുമാവുമെന്നാണ് വിലയിരുത്തുന്നത്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News