ഫോണിലൂടെ സ്ത്രീകളെ നിരന്തരം ശല്യംചെയ്യുന്ന വിരുതനെ പൊലീസ് പിടികൂടി

നെയ്യാറ്റിന്‍കര: ഫോണിലൂടെ സ്ത്രീകളെ നിരന്തരം ശല്യംചെയ്യുന്ന വിരുതനെ നേമം പൊലീസ് പിടികൂടി. തൃശൂര്‍ തലപ്പള്ളി ചേലക്കര തോന്നിക്കര വടക്കേതില്‍ അജി (34) ആണ് പിടിയിലായത്. നേമം സ്വദേശിനിയുടെ പരാതിയെ തുടര്‍ന്നാണ് അറസ്റ്റ്.

വിവാഹ വാഗ്ദാനം നല്‍കി ഇയാള്‍ നിരവധി പെണ്‍കുട്ടികളെ പീഡിപ്പിച്ചിട്ടുണ്ടെന്നാണ് പൊലീസ് നല്‍കുന്ന സൂചന. സ്വകാര്യ ചാലനിലെ കുടുംബ പ്രശ്‌നങ്ങള്‍ ചര്‍ച്ചചെയ്യുന്ന പരിപാടിയില്‍ പങ്കെടുക്കുന്ന യുവതികളെയാണ് ഇയാള്‍ കൂടുതലായും ശല്യപ്പെടുത്തിയിരുന്നത്.

ഭര്‍ത്താവുമായി പിണങ്ങിക്കഴിയുന്ന സ്ത്രീകളുടെ ഫോണ്‍നമ്പരുകള്‍ ഇയാള്‍ സംഘടിപ്പിച്ചിരുന്നു. തുടര്‍ന്ന് അവരെ നിരന്തരം ഫോണിലൂടെ ബന്ധപ്പെടും. ജീവിതം നല്‍കാമെന്നു പറഞ്ഞ് വശീകരിച്ച് പീഡിപ്പിച്ച ശേഷം മുങ്ങുകയായിരുന്നു ഇയാളുടെ പതിവ്. ഇത്തരത്തില്‍ നിരവധിക്കേസുകള്‍ ഇയാളുടെ പേരില്‍ നിലവിലുണ്ടെന്നാണ് അറിയുന്നത്. മൊബൈല്‍ ഫോണിലൂടെയും ഇന്റര്‍നെറ്റിലൂടെയുമാണ് സ്ത്രീകളെ ശല്യം ചെയ്തിരുന്നത്.

ഭര്‍തൃമതിയായ നേമം സ്വദേശിയുടെ ഫോണ്‍ നമ്പര്‍ സംഘടിപ്പിച്ചെടുത്ത അജി നിരന്തരം ഇവരെ ശല്യം ചെയ്തുകൊണ്ടിരുന്നു. ഒടുവില്‍ യുവതി നേമം സ്‌റ്റേഷനിലെത്തി പരാതിപ്പെടുകയായിരുന്നു. തിരുവനന്തപുരത്തുള്ള സുഹൃത്തിനെ കാണാനെത്തിയപ്പോഴാണ് അജി പൊലീസിന്റെ വലയിലായത്. ഇയാളില്‍ നിന്ന് നിരവധി സ്ത്രീകളുടെ ഫോട്ടോയും പിടിച്ചെടുത്തിട്ടുണ്ട്. അജി അബുദാബിയിലാണ് ജോലിചെയ്യുന്നത്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News, Phone, Police, Case, Arrested