എടിഎമ്മുകളില്‍ നിക്ഷേപിക്കേണ്ട 1.26 കോടി ഏജന്‍സിയിലെ ജീവനക്കാര്‍ തട്ടി

തലശേരി: സ്വകാര്യബാങ്കുകളുടെ എടിഎമ്മുകളില്‍ നിക്ഷേപിക്കേണ്ട 1.26 കോടി രൂപ പണം നിക്ഷേപിക്കുന്ന ഏജന്‍സിയിലെ ജീവനക്കാര്‍ തട്ടിയെടുത്തു. എച്ച്ഡിഎഫ്‌സി ബാങ്കിന്റെ ഏഴു ശാഖകളിലും ഐഡിബിഐ ബാങ്കിന്റെ ഒരു ശാഖയിലുമായി നിക്ഷേപിക്കേണ്ട 1,26,56,600 രൂപയാണു രണ്ടു ജീവനക്കാര്‍ ചേര്‍ന്നു തട്ടിയെടുത്തത്. പണം നിക്ഷേപിക്കുന്ന ഏജന്‍സിയായ റൈറ്റര്‍ സേഫ്ഗാര്‍ഡ് പ്രൈവറ്റ് ലിമിറ്റഡ് സ്റ്റേറ്റ് ഓപ്പറേഷന്‍ മാനേജര്‍ പി.എം. ഗോപാലകൃഷ്ണന്റെ പരാതി പ്രകാരം ധര്‍മടം സ്വദേശികളായ സജിത്ത്കുമാര്‍, മൃണാള്‍ എന്നിവര്‍ക്കെതിരേ ഇന്ത്യന്‍ ശിക്ഷാനിയമം 408 ാംവകുപ്പ് പ്രകാരം ടൗണ്‍ പോലീസ് കേസെടുത്തു.

കഴിഞ്ഞ 11, 12 തീയതകളിലായി എച്ച്ഡിഎഫ്‌സി തലശേരി എടിഎമ്മില്‍ നിക്ഷേപിക്കേണ്ട 80,15,00 രൂപ, പാനൂര്‍-17,50,200, കടവത്തൂര്‍-25,23,400, വാണിമേല്‍-14,50,000, മേലെചൊവ്വ-25,50,500, ചാലോട്-24,00,500, ഉരുവച്ചാല്‍-88,00,00 രൂപ ഐഡിബിഐയുടെ താണ എടിഎമ്മില്‍ നിക്ഷേപിക്കേണ്ട 30,05,00 രൂപയുമാണു സംഘം തട്ടിയെടുത്തത്.

ബാങ്കിലെ എടിഎമ്മുകളിലെ തുകകളില്‍ കുറവു കണ്ടതിനെത്തുടര്‍ന്നു റൈറ്റര്‍ സേഫ് ഗാര്‍ഡ് ഏജന്‍സി ഉദ്യോഗസ്ഥര്‍ നടത്തിയ പ്രാഥമിക പരിശോധനയിലാണു തട്ടിപ്പു കണെ്ടത്തിയത്. കമ്പനി അധികൃതര്‍ ജില്ലാ പോലീസ് ചീഫിനു നല്‍കിയ പരാതിയുടെ അടിസ്ഥാനത്തിലാണു ടൗണ്‍ പോലീസ് കേസെടുത്ത് അന്വേഷണം ആരംഭിച്ചത്. ടൗണ്‍ സിഐ വിശ്വംഭരന്‍ നായര്‍, പ്രിന്‍സിപ്പല്‍ എസ്‌ഐ എം.പി. ആസാദ്, അഡീഷണല്‍ എസ്‌ഐ മോഹന്‍ദാസ് എന്നിവരുടെ നേതൃത്വത്തിലുള്ള പോലീസ് സംഘമാണു കേസന്വേഷണം നടത്തുന്നത്. പ്രതികള്‍ക്കായി രാത്രിയില്‍ത്തന്നെ അന്വേഷണം ഊര്‍ജിതമാക്കിയിട്ടുണ്ട്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News