ജ്വല്ലറി കവര്‍ച്ച: സി.സി. ടി.വി. ദൃശ്യങ്ങള്‍ പുറത്ത്; സ്ത്രീകളുള്‍പ്പെടെ മൂന്നുപേരെ തിരയുന്നു

ചെറുവത്തൂര്‍: സ്വര്‍ണാഭരണങ്ങള്‍ വാങ്ങാനെന്ന വ്യാജേന ചെറുവത്തൂരിലെ ജ്വല്ലറിയിലെത്തി വളകള്‍ മോഷ്ടിച്ച സംഘത്തെക്കുറിച്ച് അന്വേഷണം ഊര്‍ജിതമാക്കി. ചെറുവത്തൂര്‍ ദീപ ഗോള്‍ഡില്‍നിന്നും സ്ത്രീകളുള്‍പ്പെട്ട മൂന്നംഗസംഘം അരലക്ഷത്തിലധികം രൂപ വിലവരുന്ന രണ്ട് സ്വര്‍ണവളകള്‍ കൈക്കലാക്കുന്നതിന്റെ സി.സി. ടി.വി. ദൃശ്യങ്ങള്‍ പുറത്തുവന്നിട്ടുണ്ട്.

ജ്വല്ലറി മാനേജര്‍ നല്‍കിയ പരാതിയില്‍ ചന്തേര പൊലീസ് അന്വേഷണം തുടങ്ങി. ശനിയാഴ്ച ജ്വല്ലറിയില്‍ എത്തിയ ഒരു യുവാവും രണ്ട് സ്ത്രീകളും ഉള്‍പ്പെട്ട സംഘമാണ് തട്ടിപ്പ് നടത്തിയത്.

ജ്വല്ലറിയിലെത്തിയ ഇവര്‍ വളകള്‍ വേണമെന്നാവശ്യപ്പെട്ടതനുസരിച്ച് വ്യത്യസ്ത മോഡലുകളിലുള്ള വളകള്‍ കാണിച്ചുകൊടുത്തു. ഇവ പരിശോധിക്കുന്നതിനിടയില്‍ സെയില്‍സ്മാന്റെ നോട്ടം തെറ്റിയപ്പോള്‍ രണ്ട് വളകള്‍ സംഘം കൈക്കലാക്കുകയായിരുന്നു. തിരച്ചിലിനൊടുവില്‍ തങ്ങള്‍ക്ക് ആവശ്യമുള്ള മോഡലുകള്‍ ഇല്ലെന്ന് പറഞ്ഞ സംഘം ജ്വല്ലറി വിടുകയായിരുന്നു. പിന്നീട് വളകള്‍ എടുത്തുവെക്കുമ്പോഴാണ് എണ്ണത്തില്‍ കുറവ് കണ്ടെത്തിയത്.

ഇതേത്തുടര്‍ന്ന് സി.സി. ടി.വി. ദൃശ്യം പരിശോധിച്ചപ്പോഴാണ് മൂന്നംഗസംഘം സ്വര്‍ണവളകള്‍ കൈക്കലാക്കുന്ന ചിത്രം ശ്രദ്ധയില്‍പെട്ടത്. കവര്‍ച്ചാസംഘം ഹിന്ദിയിലാണ് സംസാരിച്ചിരുന്നതെന്ന് ജ്വല്ലറി ജീവനക്കാര്‍ പറയുന്നു. ശനിയാഴ്ച ഉച്ചയോടെയാണ് സംഘം ജ്വല്ലറിയില്‍ മോഷണം നടത്തിയതെന്നാണ് സി.സി. ടി.വി. ദൃശ്യങ്ങളില്‍ രേഖപ്പെടുത്തിയിട്ടുള്ളത്.

വെള്ളിയാഴ്ച കാഞ്ഞങ്ങാട്ടെ ഒരു ജ്വല്ലറിയിലും ഇതേ സംഘം കവര്‍ച്ച നടത്തിയതായി സൂചനയുണ്ട്. എന്നാല്‍ ഇക്കാര്യം ജ്വല്ലറി ഉടമ പുറത്തുവിട്ടിരുന്നില്ല. മറ്റ് ജ്വല്ലറികളില്‍ ഈ വിവരം അറിയിക്കുകയായിരുന്നെങ്കില്‍ കവര്‍ച്ചാ സംഘത്തെ ചെറുവത്തൂരില്‍ വെച്ച് പിടിക്കാമായിരുന്നുവെന്ന് ജ്വല്ലറി അധികൃതര്‍ പറയുന്നു. അന്യ സംസ്ഥാനക്കാരായ ചിലര്‍ കാസര്‍കോട്ടും മുമ്പ് ഇത്തരത്തില്‍ തട്ടിപ്പ് നടത്തിയതായി പൊലീസ് പറയുന്നു.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News