പരീക്ഷകള്‍ ബാക്കിയാക്കി വിഷ്ണുരാജ് ഓടിയകന്നത് മരണത്തിലേക്ക്

കാഞ്ഞങ്ങാട്: രണ്ട് പരീക്ഷകൂടി എഴുതി നല്ല മാര്‍ക്കോടെ എസ്.എസ്.എല്‍.സി. പാസായി ഉയര്‍ന്ന വിദ്യാഭ്യാസം നേടണമെന്ന ആഗ്രഹം ബാക്കിയാക്കിയാണ് വിഷ്ണുരാജ് മരണക്കയത്തിലേക്ക് മുങ്ങിത്താഴ്ന്നത്.

കാഞ്ഞങ്ങാട് ദുര്‍ഗ ഹയര്‍സെക്കണ്ടറി സ്കൂളിലെ പത്താംക്ലാസ് വിദ്യാര്‍ത്ഥിയും അളറായി വയലിലെ ഓട്ടോ ഡ്രൈവര്‍ പ്രേംകുമാറിന്‍റെ മകനുമായ വിഷ്ണുരാജിന്‍റെ മരണം അളറായി വയലുകാര്‍ക്കെന്നപോലെ അരയി കാര്‍ത്തിക പ്രദേശത്തുകാരെയും ദുഃഖത്തിലാഴ്ത്തി.

അരയിപുഴയില്‍ കാര്‍ത്തിക മാളിയക്കാല്‍ ഭാഗത്താണ് സുഹൃത്തുക്കള്‍ക്കൊപ്പം വിഷ്ണുരാജ് പോയത്. കുളിച്ചുകൊണ്ടിരിക്കെയാണ് വിഷ്ണുരാജ് കയത്തില്‍പെട്ടത്. ഇതുകണ്ട് കൂട്ടുകാര്‍ ബഹളം വെച്ചതോടെ നാട്ടുകാര്‍ സ്ഥലത്തെത്തിയെങ്കിലും വിഷ്ണുരാജിനെ കണ്ടെത്താനായില്ല. സന്ധ്യയോടെയാണ് മൃതദേഹം കണ്ടെത്തിയത്.

നന്നായി പഠിക്കുന്ന വിഷ്ണുരാജിന് നല്ല മാര്‍ക്കോടെ എസ്.എസ്.എല്‍.സി. പാസായി, ഉയര്‍ന്ന വിദ്യാഭ്യാസം നേടണമെന്ന ആഗ്രഹമുണ്ടായിരുന്നതായി സ്കൂളിലെ അധ്യാപകര്‍ പറയുന്നു. രണ്ട് പരീക്ഷകള്‍ കൂടി ബാക്കിയിരിക്കെയാണ് മരണം തട്ടിയെടുത്തത്.
അമ്മ ശോഭ രണ്ടുവര്‍ഷം മുന്പ് മരണപ്പെട്ടിരുന്നു. സഹോദരന്‍: വിനയരാജ്.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News, Kannur News, Calicut News, Malappuram News