എന്‍ഡോസള്‍ഫാന്‍ ദുരിതത്തിനിരയായി മുതലമടയില്‍ ഒരു കുഞ്ഞുകൂടി

കൊല്ലങ്കോട്: സമസ്ത ജീവജാലങ്ങള്‍ക്കും ഭീഷണിയായ എന്‍ഡോസള്‍ഫാന്‍െറ മാരക വിഷം മൂലമുള്ള ദുരിതത്തിന് ഇരയായി മുതലമടയില്‍ ഒരുകുഞ്ഞു കൂടി പിറന്നു. വെള്ളാരംകടവ് ബാപുപതി കോളനിയിലെ ശെന്തില്‍കുമാര്‍ - ധനലക്ഷ്മി ദമ്പതികളുടെ നാലാമത്തെ മകളായ ഹേമലതയാണ് സാമാന്യത്തിലധികം വലിപ്പമുള്ള തലയുമായി ദുരിതമനുഭവിക്കുന്നത്. 

കഴിഞ്ഞ ഡിസംബര്‍ 28ന് തൃശൂര്‍ മെഡിക്കല്‍ കോളജില്‍ പിറന്ന കുഞ്ഞിന്‍െറ തലയിലെ നീര് ഡോക്ടര്‍മാര്‍ കുത്തിയെടുത്തെങ്കിലും കാര്യമായ പ്രയോജനം ഉണ്ടായിട്ടില്ല. ഓപറേഷനിലൂടെ ട്യൂബ് വഴി തലയിലെ നീര് പുറത്തേക്ക് പോകാനുള്ള സംവിധാനം ഉണ്ടാക്കിയിട്ടുണ്ടെന്നാണ് ഡോക്ടര്‍മാര്‍ മാതാപിതാക്കളെ അറിയിച്ചത്.

മുതലമടയിലെ മാവിന്‍തോപ്പുകളില്‍ കീടനാശിനി തളിക്കലായിരുന്നു ശെന്തില്‍കുമാറിന്‍െറ പ്രധാന ജോലി. 18 വര്‍ഷമായി ഈ ജോലിയാണ് ചെയ്യുന്നത്. എന്നാല്‍, എന്‍ഡോസള്‍ഫാനാണോ തോട്ടങ്ങളില്‍ തളിക്കുന്നതെന്ന് അറിയാമായിരുന്നില്ലെന്ന് ഇയാള്‍ പറയുന്നു. ഒരുവിധത്തിലുള്ള മുന്‍കരുതലുകളും ഇല്ലാതെയാണ് വിഷം തളിക്കാറ്.

മൂന്നാമത് ഗര്‍ഭിണിയായ ഭാര്യ എട്ടാം മാസത്തില്‍ പ്രസവിച്ചപ്പോള്‍ കുഞ്ഞിന് ജീവനുണ്ടായിരുന്നില്ല. പെണ്‍കുഞ്ഞായിരുന്നു. ആ കുഞ്ഞിന്‍െറ തലയും വലുതായിരുന്നു. എന്നാല്‍, തന്‍െറ ആദ്യ രണ്ടുമക്കള്‍ക്ക് ശാരീരിക അസ്വസ്ഥത ഒന്നുല്ലെന്ന് ശെന്തില്‍ കുമാര്‍ പറഞ്ഞു.

മാങ്കോ സിറ്റി എന്നറിയപ്പെടുന്ന തമിഴ്നാട് അതിര്‍ത്തി പ്രദേശത്തെ മുതലമടയില്‍ എന്‍ഡോസള്‍ഫാന്‍ ദുരിതബാധിതരുടെ എണ്ണം വര്‍ധിച്ചുവരുന്നത് സര്‍ക്കാര്‍ ഗൗരവത്തില്‍ കാണണമെന്ന് എന്‍ഡോസള്‍ഫാന്‍ വിരുദ്ധ സമിതി പ്രവര്‍ത്തകന്‍ നീളിപ്പാറ മാരിയപ്പന്‍ ആവശ്യപ്പെട്ടു.

തലച്ചോറില്‍ ഉണ്ടാകുന്ന വളര്‍ച്ച മുരടിക്കലും ചിലഭാഗത്തെ അനിയന്ത്രിത വളര്‍ച്ചയുമാണ് തലയിലെ നീരിന് കാരണമെന്ന് ബാപുപതി കോളനിയിലത്തെിയ മുതലമട പ്രാഥമിക ആരോഗ്യ കേന്ദ്രത്തിലെ ഡോ. അരുള്‍രാജ് പറഞ്ഞു. ഹേമലതയുടെ തല വലുതായതിനുകാരണം എന്‍ഡോസള്‍ഫാനാണെന്ന് ഉറപ്പിച്ചുപറയാന്‍ കഴിയില്ലെന്ന്ഡോക്ടര്‍ വ്യക്തമാക്കി. കൂടുതല്‍ പരിശോധന ഇക്കാര്യത്തില്‍ നടത്തേണ്ടതുണ്ട്. പഠനം നടത്തേണ്ടതിന്‍െറ ആവശ്യകത ചൂണ്ടിക്കാണിച്ച് ജില്ലാ മെഡിക്കല്‍ ഓഫിസര്‍ക്ക് കത്ത് നല്‍കുമെന്ന് ഗ്രാമപഞ്ചായത്ത് പ്രസിഡന്‍റ് എസ്.വി. ശെല്‍വന്‍ വ്യക്തമാക്കി.

Keywords: Kasaragod, Kerala, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News

	GREENWOODS
	PUBLIC SCHOOL & JUNIOR COLLEGE
	A.K. Road, P.O. Bekal, Kasaragod
ADMISSION OPEN FOR LOWER KINDERGARTEN -LKG
(Age Eligibility : 3½ years as on 01-06-2014)
& Limited seats are vacant in classes UKG TO IX (ICSE CURRICULUM)
For more details, contact Admission Counsellor Ph : 9895688729, 0467 3255688, 2265566, 2239566 Email:greenwoodsschool@gmail.com website: www.bekalgreenwoodsschool.com