കോടതിയില്‍ ഹാജരാക്കാന്‍ കൊണ്ടു പോകുകയായിരുന്ന വാറണ്ട് പ്രതി പോലീസ് പിടിയില്‍ നിന്നും രക്ഷപ്പെട്ടു

ബേഡകം: കോടതിയില്‍ ഹാജരാക്കാന്‍ കെ എസ് ആര്‍ ടി സി ബസ്സില്‍ കൊണ്ടു പോവുകയായിരുന്ന വാറണ്ട് പ്രതി പോലീസ് പിടിയില്‍ നിന്ന് രക്ഷപ്പെട്ടു. ബേഡകം ചെമ്പക്കാട്ടെ ഇബ്രാഹിം (30) ആണ് പോലീസിന്റെ കസ്റ്റഡിയില്‍ നിന്നും രക്ഷപ്പെട്ടത്. 

അടിപിടിക്കേസിലെ വാറണ്ട് പ്രതിയായ ഇബ്രാഹിമിനെ ഞായറാഴ്ച കുണ്ടം കുഴി ടൗണിലെ കടക്ക് സമീപത്ത് നിന്നാണ് ബേഡകം പോലീസ് കസ്റ്റഡിയിലെടുത്തത്. ഇബ്രാഹിം ഒരാളുമായി വാക്ക് തര്‍ക്കത്തിലേര്‍പ്പെടുകയും പ്രശ്‌നം കൈയ്യാങ്കളില്‍ എത്തുകയും ചെയ്തതോടെ വിവരമറിഞ്ഞെത്തിയ പോലീസ് ഇബ്രാഹിമിനെ പിടികൂടി പോലീസ് സ്റ്റേഷനില്‍ എത്തിക്കുകയായിരുന്നു. 
യുവാവിനെ ചോദ്യം ചെയ്തതോടെയാണ് അടിപിടി കേസിലെ വാറണ്ട് പ്രതിയാണെന്ന് വ്യക്തമായത്. 

ഇബ്രാഹിമിന്റെ അറസ്റ്റ് രേഖപ്പെടുത്തിയ ശേഷം തിങ്കളാഴ്ച ഉച്ചയോടെ പോലീസ് കാസര്‍കോട് കോടതിയില്‍ ഹാജരാക്കാനായി കെ എസ് ആര്‍ ടി സി ബസ്സില്‍ കൊണ്ടുപോകുമ്പോള്‍ കുണ്ടംകുഴി സ്റ്റോപ്പില്‍ ബസ്സ് നിര്‍ത്തിയ ഉടന്‍ തന്നെ പ്രതി പോലീസ് പിടിയില്‍ നിന്നും കുതറി മാറി ബസ്സില്‍ നിന്നും ഇറങ്ങി ഓടുകയായിരുന്നു. പോലീസ് പിറകെ ഓടിയെങ്കിലും ഇബ്രാഹിമിനെ കണ്ടത്താന്‍ കഴിഞ്ഞില്ല. ഇബ്രാഹിമിനെ എത്രയും വേഗം പിടികൂടാനുള്ള ശ്രമത്തിലാണ് പോലീസ്.

Keywords: Kasaragod, Bedakam, Kerala News, International News, National News, Gulf News, Health News, Educational News, MalabarFlash, Malabar Vartha, Malabar News, Malayalam News