കോണ്‍ക്രീറ്റ്‌ ഏണിപ്പടി തകര്‍ന്ന്‌ തൊഴിലാളി മരിച്ചു

മഞ്ചേശ്വരം: [www.malabarflash.com] കെട്ടിട നിര്‍മ്മാണ തൊഴിലാളി കോണ്‍ക്രീറ്റ്‌ ഏണിപ്പടി തകര്‍ന്നു വീണു മരിച്ചു. മഞ്ചേശ്വരം ഗോവിന്ദ പൈ കോളേജിനു സമീപത്തു താമസിക്കുന്ന തൃശൂര്‍, മാള നാലാം പൊയ്യ സ്വദേശി പ്രസന്ന കുമാര്‍ എന്ന കുട്ടന്‍(42) ആണ്‌ മരിച്ചത്‌. ഞായറാഴ്ച വൈകുന്നേരമായിരുന്നു അപകടം. കോളേജിനു സമീപത്തെ ഒരു വീട്ടില്‍ ജോലിക്കെത്തിയതായിരുന്നു പ്രസന്നകുമാര്‍. ജോലിക്കിടയില്‍ സ്ലാബ്‌ തകര്‍ന്നു ദേഹത്തു വീഴുകയായിരുന്നു. സ്ലാബ്‌ നീക്കി പ്രസന്നകുമാറിനെ രക്ഷിക്കാന്‍ വീട്ടുകാരും കൂടെ ജോലി ചെയ്‌തിരുന്ന ആളും ശ്രമിച്ചുവെങ്കിലും ഫലിച്ചില്ല. തുടര്‍ന്ന്‌ ഉപ്പളയില്‍ നിന്നും ഫയര്‍ഫോഴ്‌സെത്തി മെഷീന്‍ ഉപയോഗിച്ച്‌കോണ്‍ക്രീറ്റ്‌ മുറിച്ചാണ്‌ പുറത്തെടുത്തത്‌. അപ്പോഴേയ്‌ക്കും മരണപ്പെട്ടിരുന്നു. മഞ്ചേശ്വരം സഹകരണ ബാങ്കിന്റെ കുഞ്ചത്തൂര്‍ ശാഖയില്‍ ക്ലാര്‍ക്കായ ബിജിയാണ്‌ ഭാര്യ. പരേതനായ രാമന്‍ തുളസി മാതാപിതാക്കളും രുഗ്മിണി ഗോപാലന്‍, സുബ്രഹ്മണ്യന്‍, അംബിക, സരോജ, രത്‌നാമണി, ഉണ്ണികൃഷ്‌ണന്‍, ബിന്ദു സഹോദരങ്ങളുമാണ്‌. മൃതദേഹം പോസ്റ്റുമോര്‍ട്ടത്തിനു ശേഷം സ്വദേശമായ തൃശൂരിലേയ്‌ക്കു കൊണ്ടുപോയി.

Keywords: Kerala News, Kerala Vartha, Malabarflash, Malabar news, Malayalam News